Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 126 Hüküm no: 117 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa’nın evlâdı Fâtıma, Havva ve İsmihân’ın orman, bağ ve menzili Fâtıma Hâtun bt. Mehmed Efendi’ye sattıkları Mahmiye-i Kostantıniyye -humiyet ani’l-âfât ve’l-beliyye- mahallâtından Tahtaminâre mahallesinde sâkine iken bundan akdem fevt olan merhûme Hatice Hâtun bt. Hasan nâm müteveffânın verâseti sadriye kebîre kızları Fâtıma ve Havvâ ve İsmihân evlâdü’l-merhûm Mehmed Ağa’ya münhasıra olduğu şer‘an mütehakkik oldukdan sonra mezkûrâtı taraflarından vech-i âtî üzre bey‘ ve kabz-ı semeni ikrâra vekîl olup hasm-ı şer‘î-i câhid mahzarında mezkûrâtın zâtını ma‘rifet-i şer‘î ile ârifân olan Hasan Bey b. Abdullah el-Cündî ve Hasan Beşe b. Abdullah şehâdetleriyle şer‘an vekâleti sâbite mezbûre Fâtıma’nın zevci olan zübdetü’l-a‘yân Mustafa Ağa b. Yusuf Çavuş meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızası zahrü’l-muvakkarât Fâtıma Hâtun bt. el-merhûm Mehmed Efendi kıbelinden şirâ ve tasdîke vekîl olup Ahmed b. Mehmed ve Ahmed b. İbrahim şehâdetleri [ile] vekâleti sâbite olan mefharü’l-a‘yân Mehmed Efendi b. Perviz mahzarında bi’l-vekâle ikrâr ve takrîr-i kelâm edip akd-i âtî sudûruna değin ale’l-iştirâki’s-seviy mutasarrıf oldukları emlâkden kazâ-i Havâss-ı Refî‘a müzâfâtından Çatalca nâhiyesine tâbi‘ merhûm Şeyh Sinan demekle ma‘rûf karyede vâki‘ bir tarafdan Osman Çelebi b. ( ) mülküne ve üç tarafdan tarîk-i âma müntehî büyût-ı müte‘addideyi ve mâ-i cârîyi ve ahırı ve samanlığı müştemil mülk menzili ve yine karye-i mezbûre kurbunda Germe deresi demekle ma‘rûf mevzi‘de vâki‘ beher sene arsasının merhûm müşârün-ileyh Şeyh Sinan vakfı’na on beş akçe mukāta‘ası olan mülk orman korusunu ve yine karye-i mezbûre kurbunda vâki‘ bir tarafdan menzil-i mezbûra ve bir tarafdan karye-i mezbûre mer‘âsına ve bir tarafdan ( ) mülküne ve bir tarafdan tarîk-i âma müntehî bir kıt‘a mülk bağı ve yine karye-i mezbûre kurbunda vâki‘ etrâfı vâdi ve karye-i mezbûre mer‘âsı ile mahdûd olup arsasının merhûm müşârün-ileyh Şeyh Sinan vakfı’na beher sene on beş akçe mukāta‘ası olan tahmînen bir dönüm bir kıt‘a mülk bağı cümle tevâbi‘ ve levâhıkı ve âmme-i menâfi‘ ve merâfıkı ile bi-safkatin vâhidetin müvekkile-i mûmâ-ileyh Fâtıma Hâtun’a yirmi bin cedîd ve ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve ol dahi vech-i mübeyyen üzre iştirâ ve kabz ve tesellüm eyledikden sonra semeni olan meblağ-ı mersûm yirmi bin nakd-i mezbûrü’n-na‘t akçeyi vekîl-i mûmâ-ileyh Mehmed Efendi yedinden bi’t-tamâm ve’l-kemâl ahz u kabz eyledim, ba‘de’l-yevm zikr olunan menzil ve orman ve bağ müvekkile-i mesfûre Fâtıma Hâtun’un mülk-i müşterâ-yı sarîhidir keyfe mâ teşâ’ve türîd mutasarrıfe olsun dedikde vekîl-i mezbûr Mustafa Ağa’nın vech-i mübeyyen üzre cârî olan ikrâr ve takrîrini vekîl-i müşârün-ileyh Mehmed Efendi bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ aşer min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mehmed Ağa b. Abdurrahman el-Bevvâbü’s-sultânî, Mehmed b. Mustafa el-Cündî, Süleyman b. Hüseyin el-Cündî, Ahmed b. İbrahim, İbrahim b. Mehmed el-İmâm, Ali b. Mustafa, Musa b. Mustafa ve gayruhüm mine’l-huzzâr