Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 127 Hüküm no: 118 Orijinal metin no: [22b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mihal v. Yani’nin Panayot v. Yorgi’nin tarlasını tasarrufuna engel olduğu iddiası, tarlanın otuz seneden beri Panayot’un babası Yorgi’nin tasarrufunda olduğu Vilâyet-i Rumeli’nde Kartine kazâsına tâbi‘ Valtaşinik nâm karyede sâkin bâ‘isü’l-kitâb Panayot v. Yorgi nâm zimmî meclis-i şer‘-i hatîr-i lâzımü’t-tevkīrde yine karye-i mezbûreden Mihal v. Yani nâm zimmîyi ihzâr ve muvâcehesinde üzerine da‘vâ ve takrîr-i kelâm edip karye-i mezbûre sınırı dâhilinde Papayorya nâm cebel dibinde vâki‘ bir tarafı Manastır tarlası ve bir tarafı Panayot tarlası ve bir tarafı Todori v. Papalaş tarlası ve bir tarafı cebel-i mezbûr ile mahdûd tahmînen altı keyl tohum isti‘âb eder bir kıt‘a tarlayı babam mezbûr Yorgi sene isneteyn ve selâsîn ve elf târihinde Bahadır nâm kimesneden üç bin sekiz yüz akçeye sipâhisi Haydar izniyle tefevvuz edip hâl-i hayâtında on altı sene mutasarrıf olup mürd oldukdan sonra tasarrufu bana intikāl etmiş iken hâlen merkūm Mihal tasarrufuma mâni‘ olur, suâl olunup takrîri tahrîr ve bi-hasebi’ş-şer‘ kasr-ı yedine tenbîh olunması matlûbumdur dedikde gıbbe’s-suâl ve akībe’l-istintâk mezbûr Mihal cevâbında zikr olunan tarlayı târih-i kitâbdan otuz sene mukaddem Bahadır’ın oğlu Sinan nâm kimesneden tefevvuz eyledim velâkin niceye aldığım bilmem deyicek müdde‘î-i mezbûrdan sıdk-ı makālini mübeyyine beyyine taleb olundukda yine karye-i mezbûre zimmîlerinden Verana v. Yani ve Yani v. Lafez nâm zimmiyân li ecli’ş-şehâde meclis-i şer‘a hâzırân olup fi’l-hakīka mârrü’z-zikr tarlayı târih-i mezbûrede merkūm Panayot’un babası mezbûr Yorgi üç bin sekiz yüz akçeye bizim huzûrumuzda merkūm Bahadır’dan tefevvuz edip ilâ yevminâ hâzâ tasarruf eyledi, bu husûsa şâhidleriz şehâdet dahi ederiz deyû edâ-i şehâdeti’ş-şer‘iyye ettiklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra mûcebiyle merkūm Mihal bî-vech mu‘ârazadan men‘ olunup mâ hüve’l-vâki‘ alâ vukū‘ihî gıbbe’l-ibtigā sebt olundu. Hurrire fi’l-yevmi’l-âşir min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Ali Beşe el-Muhzır, Mustafa Beşe el-Muhzır, Baba Süleyman el-Muhzır, Musa b. Mustafa, Dimitri [v.] Yorgi, Niko [v.] Layani, Kosta [v.] Yani, Yani [v.] Laka, Androhaso [v.] Yorgi, Yani [v.] Mihal ve gayruhüm mine’l-huzzâr