Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 128 Hüküm no: 119 Orijinal metin no: [23a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Nikola’nın Panayot v. Yorgi’ye mülk menzili ile tarla ve bağın yarım hissesini sattığı Vilâyet-i Rumeli’nde Mora sancağında Kartine kazâsına tâbi‘ Valtaşinik nâm karyede sâkin Yorgi v. Nikola nâm zimmî tarafından bey‘ ve tefvîz-i âti’z-zikri ikrâra vekîl olup hasm-ı şer[‘î]-i câhid mahzarında Mihal v. Yani ve Kosta v. Nikola şehâdetleri ile şer‘an vekâ[leti] sâbite olan Andriye v. Yorgi meclis-i şer‘-i hatîr-i lâzımü’t-tevkīrde müvekkil-i mezbûr Yorgi’nin dâmâdı işbu râfi‘ü’l-kitâb Panayot v. Yorgi muvâcehesinde bi’l-vekâle ikrâr ve takrîr-i kelâm edip akd-i âtî sudûruna değin müvekkil-i mezbûrun silk-i mülk-i sahîhimde münselik olan emlâkden karye-i mezbûrede vâki‘ etrâfı Rizo v. Mavrodi ve Baba Mihal v. Yani ve Anderceso v. Papa Tonlu mülkleri ve tarîk-i âm ile mahdûd bir fevkānî beyti ve altında mahzeni müştemil mülk menzili ve yine karye-i mezbûrede vâki‘ lede’l-ahâlî ma‘lûmü’l-hudûd bir fevkānî beyti ve altında mahzeni ve bostan yerini ve zât-ı eşcâr-ı müsmire hadîkayı müştemil mülk menzili ve karye-i mezbûre bağları dâhilinde vâki‘ lede’l-cîrân ma‘lûmü’l-hudûd tahmînen yirmi çapalık üç kıt‘a bağdan ve şırahâne ve üç aded kebîr fıçıdan nısf hisse-i şer‘iyye-i şâyi‘asını bi-safkatin vâhidetin ve dâmâdı merkūm Panayot’a dört bin beş yüz elli dört ceyyid ve cedîd râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip mârrü’z-zikr mebî‘leri mahallinde kabza müşterî-i [me]rkūmu taslît eylediğimden sonra yine karye-i mezbûre sınırı dâhilinde vâki‘ inde ahâliyi’d-diyâr her biri ma‘lûmü’l-hudûd ve’l-mikdâr mevâzi‘-i müteferrikada vâki‘ tahmînen iki müd tohum isti‘âb eder on beş kıt‘a tarladan nısfının hakk-ı tasarrufunu dahi sâhib-i arz ma‘rifetiyle merkūma tefvîz edip ol dahi vech-i mübeyyen üzre tefevvuz ve kabûl eyledikden sonra mukābele-i tefvîzde olan bin nakd-i mezbûrü’n-na‘t akçeyi mezbûr Panayot yedinden tamâmen ahz u kabz eyledim, ba‘de’l-yevm zikr olunan emlâkden nısf hisse-i şer‘iyye-i şâyi‘ası merkūm Panayot’un emlâk-ı müşterâ-yı sarîhidir ve mârrü’z-zikr tarlaların dahi nısfının hakk-ı tasarrufu mezbûrundur, sâir emsâli tasarrufu gibi mutasarrıf olsun dedikde gıbbe’t-tasdîk mâ vaka‘a bi’t-taleb ketb olundu. Hurrire fi’l-yevmi’l-âşir min Rebî‘ilâhir li sene erba‘a ve hamsîn ve elf. Şuhûdü’l-hâl: Ali b. Mustafa, İbrahim Çelebi b. Mustafa, Baba Süleyman b. Turgud, Musa b. Mustafa, Dimitri v. Yorgi, Panayot v. Yorgi, Kosta v. Nikola, Yani [v.] Mihal, Rizo v. Mavrodi, Panayot v. Mihal, Varto v. Yani, Yani [v.] Laka