Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 133 Hüküm no: 125 Orijinal metin no: [24a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bağdâdîzâde Hasan Efendi b. Ahmed Efendi’nin babası Bülbül’e ödünç verdiği parayı kefîl olan Babuk’dan talep ettiği Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından merhûm Davud Ağa mahallesi sâkinlerinden fahrü’l-müderrisîni’l-kirâm Hasan Efendi b. Ahmed Efendi el-ma‘rûf bi-Bağdâdîzâde meclis-i şer‘-i hatîr-i lâzımü’t-tevkīrde habbâz tâifesinden Babuk v. Bülbül nâm zimmîyi ihzâr ve muvâcehesinde üzerine da‘vâ ve takrîr-i kelâm edip bundan akdem mezbûr Babuk’un babası gāib ani’l-meclis mezbûr Bülbül’e bi-tarîki’l-karzi’ş-şer‘î sekiz bin cedîd ve ceyyid râyic fi’l-vakt [akçe] ikrâz ve ol dahi istikrâz ve kabz ettikden sonra meblağ-ı mersûma merkūm Babuk emr-i kabûlü hâvî kefâlet ile kefîl bi’l-mâl olmuşdu el-hâletü hâzihî meblağ-ı mezbûru kefâleti hasebiyle merkūmdan taleb ederim, suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mûmâ-ileyh Hasan Efendi’den iddi‘âsını mübeyyine beyyine taleb olundukda udûl-i müslimînden mahalle-i mezbûrede sâkin Davud Halîfe b. Mehmed ve Ahmed Çelebi b. Ali nâm râcil li ecli’ş-şehâde hâzırân bi’l-meclis olup isre’l-istişhâd fi’l-hakīka mukaddemâ mezbûr Babuk’un babam gāib ani’l-meclis mezbûr Bülbül’e mûmâ-ileyh Hasan Efendi sekiz bin mezbûrü’n-na‘t nakid akçe ikrâz ve teslîm ve ol dahi istikrâz ve tesellüm eyledikden sonra meblağ-ı mezbûr[a] merkūm Babuk bizim huzûrumuzda emr-i kabûlü hâvî kefâlet ile kefîl oldu bu husûsa şâhidleriz, şehâdet dahi ederiz deyû edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl merkūmânın şehâdetleri hayyiz-i kabûlde vâki‘ oldukdan sonra kefâleti hasebiyle meblağ-ı mezbûrun edâsına merkūm Babuk’a tenbîh birle mâ hüve’l-vâki‘ bi’t-taleb ketb olundu. Hurrire fi’l-yevmi’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mehmed Efendi b. Muharrem el-İmâm, Usta Ali b. İsâ, Mustafa Beşe el-Muhtesib, Ali Beşe b. Mustafa el-Muhzır ve gayruhüm mine’l-huzzâr