Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 133 Hüküm no: 126 Orijinal metin no: [24b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sinan b. Sinan’ın kasaplık yaparken Panayot’a verdiği koyunları oğlu Andon’dan talep ettiği ve bedel karşılığında sulh oldukları Vilâyet-i Rumeli’nde Kartine kazâsına tâbi‘ Akhisar mahallâtından Hatuz? mahallesinde sâkin Sinan b. Sinan nâm kimesne meclis-i şer‘-i hatîr-i lâzımü’t-tevkīrde işbu hâmilü’l-kitâb Panayot v. Polimizoni nâm zimmî tarafından husûs-ı âti’l-beyâna vekîl olup hasm-ı câhid mahzarında Yani v. Hristodoli ve Nikola v. Angeli şehâdetleriyle şer‘an vekâleti sâbite olan sulbî oğlu Andon muvâcehesinde ikrâr ve takrîr-i kelâm edip bundan akdem kasaba-i mezbûrede iken merkūm Panayot’a ra‘y etmek için yetmiş re’s koyun vermişdim, zikr olunan koyundan otuz re’s koyunumu mersûm Andon’dan taleb eylediğimde beynimizde münâza‘ât-ı kesîre ve muhâsamât-ı ekîde vâkı‘a oldukdan sonra el-hâletü hâzihî beynimize muslihûn tavassut edip es-sulhu seyyidü’l-ahkâm fehvâsınca on kıt‘a riyâlî guruş üzerine beni inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mersûm on kıt‘a riyâlî guruşu merkūm Andon yedinden tamâmen ahz u kabz edip husûs-ı mezbûra müte‘allik da‘vâ ve talebden zimmetini ibrâ-i âm ile ibrâ ve iskāt-ı tâm ile iskāt eyledim, ba‘de’l-yevm husûs-ı mezbûra müte‘allik benden bi’z-zât yâhud bi’l-vâsıt[a] da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûrun vech-i mübeyyen üzre cârî olan ikrâr ve takrîrini vekîl-i mezbûr Andon bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’l-ışrîn min şehri Rebî‘ilâhir li sene 1054. Şuhûdü’l-hâl: Fahrü’l-kuzât Ali Efendi b. Derviş, zahrü’l-vülât Mahmud Efendi b. Derviş, Ali Beşe b. Derviş er-Râcil, Receb Beşe b. Abdullah, İskender b. Süleyman ve gayruhüm