Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 138 Hüküm no: 132 Orijinal metin no: [25b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefât eden Yusuf Ağa b. Hüseyin’in borçları ve vârislerinin nafaka ihtiyâcı için menzilinin Fâtıma Hâtun bt. Mirza’ya satıldığı, tasarrufundaki tarlalarının da devredildiği Mahmiye-i İstanbul’da merhûm Koca Mustafa Paşa Câmi‘i kurbunda Arabacı Bayezid mahallesinde sâkin iken bundan akdem vefât eden Yusuf Ağa b. Hüseyin nâm müteveffânın verâseti sulbî kebîr oğlu Mehmed Çelebi’ye ve sulbiye sagīre kızı Fâtıma’ya ve zevce-i metrûkesi Ümmühâni bt. Mehmed nâm hâtuna münhasıra [olduğu] şer‘an mütehakkik olundukdan sonra mezbûr Mehmed Çelebi asâleten ve sagīre-i mezkûre Fâtıma’nın vasiyy-i muhtâr ve vâlidesi merkūme Ümmühâni asâleten ve vesâyeten meclis-i şer‘-i hatîr-i lâzımü’t-tevkīrde işbu kitâb-ı sedâdın hâfızası Fâtıma Hâtun bt. Mirza tarafından husûs-ı âti’l-beyânı tasdîke vekîl olup hasm-ı şer‘î-i câhid mahzarında bimâ hüve nehcü’s-sübût vekâleti sâbite olan zahrü’l-eşbâh Mehmed Beşe b. Hasan mahzarında asâleten ve vesâyeten her biri ikrâr-ı tâm ve takrîr-i kelâm edip müteveffâ-yı mezbûrun muhallefâtından irs-i şer‘î ile bize intikāl eden emlâkden Havâss-ı Aliyye kazâsı müzâfâtından Büyükçekmece nâhiyesine tâbi‘ Çakmaklı nâm karyede vâki‘ bir tarafdan Mehmed Beşe b. Davud nâm râcil mülküne ve bir tarafdan Mehmed Ağa mülküne ve iki tarafdan tarîk-i âma müntehî bir bâb fevkānî ve bir bâb tahtânî beyti ve anbarı ve sofayı ve fırını ve matbahı ve ahırı ve samanlığı ve bi’r-i mâyı ve tahmînen on beş çapalık bağı ve havluyu müştemil mülk-i mevrûsları olan menzili ve bir çift su sığırı öküzü ve üç çift kara sığır öküzü ve üç re’s dana ve üç aded araba deyn-i müsbet ve zarûret-i nafaka için bey‘ olunması lâzım ve mühim olmağın sûk-ı sultânîde müzâyede olunup rağabât-ı nâs münkatı‘a olundukdan sonra ziyâde ile tâlib-i âhar olmayıp müvekkile-i mezbûre Fâtıma Hâtun üzerinde on üç bin cedîd ve ceyyid râyic fi’l-vakt akçede karâr etmeğin ben dahi zikr olunan emlâkimi bi-safkatin vâhidetin mezbûre hâtuna semeni olan on üç bin nakd-i mezbûrü’n-na‘t akçeye bey‘-i bâtt-ı sahîh-i şer‘î ile bey‘ ve teslîm ve ol dahi iştirâ ve tesellüm ettikden sonra yine karye-i mezbûre sınırı dâhilinde vâki‘ merhûm Sultan Bayezid Hân -aleyhi’r-rahmetü ve’l-gufrân- hazretlerinin arâzi-i mevkūfesinden taht-ı tasarrufumuzda olup mevâzi‘-i müteferrikada vâki‘ inde ahâliyi’d-diyâr her biri ma‘lûmü’l-hudûd ve’l-mikdâr tahmînen on beş müd tohum isti‘âb eder yirmi kıt‘a tarlanın hakk-ı tasarrufunu mütevellî-i vakf-ı mezbûr ma‘rifetiyle müvekkile-i mezbûre Fâtıma Hâtun’a on iki bin cedîd ve ceyyid râyic fi’l-vakt akçeyi müvekkile-i mezbûre Fâtıma Hâtun yedinden bi’t-tamâm ve’l-kemâl ahz u kabz eyledim ba‘de’l-yevm zikr [olunan] menzil ve eşyâ [26a ] müvekkile-i mezbûre Fâtıma Hâtun’un mülk-i müşterâ-yı sarîhidir ve mârrü’z-zikr yirmi kıt‘a tarla dahi mersûmenindir sâir emsâli tasarrufu gibi mutasarrıfe olsun dedikde mukırrân-ı mezbûrânın minvâl-i muharrer üzre cârî ve sâdır olan ikrâr ve takrîrlerini vekîl-i mersûm Mehmed Beşe bi’l-muvâcehe tasdîk ve bi’l-müşâfehe tahkīk edicek mâ vaka‘a ketb ü tahrîr olundu. Hurrire fi’l-yevmi’s-sânî ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Hüseyin Halîfe b. Mustafa el-İmâm, Mehmed Efendi b. ( ) el-İmâm, Mustafa Dede b. Abdullah el-Müezzin, el-Hâc Hasan b. Abdullah et-Tâcir, Mehmed Çelebi b. Hasan, el-Hâc Rıdvan b. Abdullah, Mahmud Çelebi b. Receb, el-Hâc Veli b. Musa, Sinan Bey b. Abdullah er-Râcil, el-Hâc Ali b. Abdülganî, Sefer b. el-Hâc …?, Mustafa b. Receb ve gayruhüm mine’l-huzzâr