Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 139 Hüküm no: 133 Orijinal metin no: [26a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Riga v. Dini’nin Yuvan v. Petro ile Yani v. İstiko’da koyun satışından alacağı olduğunun tespiti ve ödenmesinin talep edildiği Medîne-i Ebâ Eyyûb-i Ensârî -radiye anhu Rabbühü’l-Bârî- kazâsına tâbi‘ Avasya nâm karyeden işbu râfi‘ü’l-kitâb Riga v. Dini meclis-i şer‘-i lâzımü’t-tevkīrde çoban tâifesinden Yuvan v. Petro ve Yani v. İstiko nâm zimmîler muvâcehelerinde üzerine takrîr-i da‘vâ edip bundan akdem mezbûrân Yuvan ve Yani benden beher re’s yüz on ikişer akçeye hesâbı olmak üzre iki bin dokuz yüz otuz akçeye yüz on iki re’s koyun iştirâ ve kabz eyleyip semen-i mezbûrdan üç yüz akçesini merkūm Yani yedinden ve iki bin yüz altmış akçesini merkūm Yuvan’dan ki cem‘an iki bin dört yüz altmış akçesini alıp zimmetlerinde dört yüz yetmiş akçe hakkım bâkī kalmışdır suâl olunup alıverilmesi matlûbumdur dedikde gıbbe’s-suâl her biri cevâbında müdde‘î-i mezbûr Riga’nın cümle müdde‘âsını ikrâr ve tasdîk ve vech-i muharrer üzre mersûm Riga’dan iştirâ ve kabz eyledikleri koyun bahâsından zimmetlerinde dört yüz yetmiş akçe hakkı bâkī olduğunu i‘tirâf ve tahkīk eylediklerinde ber mûceb-i ikrârihimâ meblağ-ı mezbûr dört yüz yetmiş akçenin edâsına hüküm birle işbu hurûf bi’t-taleb ketb ü tahrîr olundu. Hurrire fi’l-yevmi’t-tâsi‘ min şehri Rebî‘ilâhir li sene 1054. Şuhûdü’l-hâl: Ali Beşe b. Mustafa el-Muhzır, Musa b. Mehmed, İbrahim Çelebi b. Mustafa, Dede Mehmed b. Bayram ve gayruhüm mine’l-huzzâr