Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 140 Hüküm no: 134 Orijinal metin no: [26a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aleksi v. Yani’nin evini Fütûha Hâtun Vakfı’na bey‘ bi’l-istiğlâl yoluyla sattığı Kostantıniyyetü’l-mahmiyye hısnı ebvâbından Eğrikapı kapısı dâhilinde Avcı Bey mahallesinde sâkin Aleksi v. Yani nâm zimmî meclis-i şer‘-i şerîfde -Allahü te‘âlâ tağyîr ve tahrîfden korusun- ikrâr ve i‘tirâf edip bu akdin sudûruna değin kendisine âid mülkü olup yedinde ve taht-ı tasarrufunda bulunan mahalle-i mezbûrede vâki‘ bir tarafdan Kosta v. Yani mülkü ve bir tarafdan Yani v. Yorgi mülkü bir tarafdan Kostantıniyyetü’l-mezbûre hısnı duvarı ve bir tarafdan tarîk-i âm ile mahdûd olan cemî‘ menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık kadri ve nisâbı diyâr-ı Rûmiyye’de râyic riyâlî guruş ta‘bîr olunur harbî sikke ile meskûk kırk kıt‘a-i fıddî semen-i mu‘ayyen-i makbûza hâmil-i hâze’l-kitâb merhûme Fütûha Hâtun vakfı’na mütevellî olan Halil Çelebi b. Hüdâverdi’ye bey‘ etmeğin ol dahi vakf-ı mezbûr malı ile ondan istiğlâlen iştirâ eyleyip bey‘ ve iştirâ-i sahîhayn-i şer‘iyyeyn eyledikden sonra menzil-i mezbûru ba‘de’t-tahliyye ve’t-tekābuz işbu kitâbın zeylindeki târihin şehri gurresinden sene-i kâmile tamâmına değin bu müddet için mikdârı dört yüz seksen dirhem mezbûrü’n-na‘t ücret-i mu‘ayyeneye mütevellî-i mezbûrdan istîcâr ve ol dahi ona îcâr eylediğinde îcâr ve istîcâr-ı sarîhayn-i mer‘iyyeyn ve ikrâr-ı sahîh-i şer‘î ve i‘tirâf-ı sarîh-i mer‘î ile ikrâr ve i‘tirâf etmeğin mütevelli’l-mezbûr kıbelinden dahi vicâhen tasdîk olundukdan sonra meblağ-ı mersûmun aslına ve menzil-i mesfûrun derkine ve ücret-i merkūmeye hepsi mahalle-i mezbûrede sâkin olan Baba Anastas v. Aleksi ve Kosta v. Yani ve Laskari v. Yani nâm zimmîlerin her biri emr ve kabûlü hâviye kefâlet-i sahîha-i şer‘iyye ile kefîl olmağın [kayd olundu]. Cerâ zâlike ve hurrire fi’l-yevmi’r-râbi‘ ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Veli Çelebi b. İsâ, Mustafa Çelebi b. Mehmed, Mehmed Çelebi b. Mehmed, Mustafa b. Mehmed ve gayruhüm mine’l-huzzâr