Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 141 Hüküm no: 136 Orijinal metin no: [26b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nevruz v. Mıgırdiç’in boş arâzisini Arzuman v. Gazal’a sattığı ve bedelini tahsil ettiği Vilâyet-i Anadolu’da Eğin kazâsına tâbi‘ Gemirgab nâm karye sâkinlerinden Nevruz v. Mıgırdiç nâm Ermeni meclis-i şer‘-i hatîr-i lâzımü’t-tevkīrde işbu hâmilü’l-kitâb Arzuman v. Gazal nâm Ermeni muvâcehesinde bi’t-tav‘ ve’r-rızâ ikrâr ve i‘tirâf edip akd-i âtî sudûruna değin silk-i mülkümde münselik olan emlâkinden karye-i mezbûrede vâki‘ iki tarafdan yine benim mülküme ve iki tarafdan müşterî-i mezbûr Arzuman mülküne müntehî mahdûd fevkānî ve tahtânî beyti hâvî hayât ta‘bîr olunur mülk arz-ı hâliyeyi on iki kıt‘a riyâlî guruşa bey‘ ve teslîm ve ol dahi iştirâ ve tesellüm ettikden sonra semeni olan meblağ-ı mersûm on iki kıt‘a riyâlî guruşu merkūm Arzuman yedinden bi’t-tamâm ve’l-kemâl ahz u kabz edip mebî‘-i mezkûru mahallinde kabza müşterî-i merkūmu taslît eyledim, ba‘de’l-yevm zikr olunan hayât merkūm Arzuman’ın mülk-i müşterâ-yı sarîhidir keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-mezbûr Arzuman bi’l-muvâcehe tasdîk edicek mâ hüve’l-vâki‘ gıbbe’l-ibtigā sebt ve imlâ olundu. Hurrire fi’l-yevmi’s-sânî ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Ali Beşe el-Muhzır, Mustafa Beşe el-Muhzır, Mustafa Çelebi, Hüseyin Çelebi b. Ali, Mircan v. Sirlen?, Arnik v. Yani, Yagop v. Arabid, Serkis v. Garadik ve gayruhüm mine’l-huzzâr