Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 142 Hüküm no: 138 Orijinal metin no: [26b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Defterdâr Ömer Efendi’nin oğulları Mehmed Bey ile Mustafa Bey’in tasarruflarındaki vakıf bostan yerini Receb Ağa’ya tefvîz ettikleri Mahmiye-i Kostantıniyye -humiyet ani’l-âfât ve’l-beliyye- mahallâtından ( ) mahallesi sâkinlerinden iken fevt olup sâbıkan defterdâr olan merhûm ve mağfûrun-leh Ömer Efendi’nin necl-i necîbleri olan umdetü’l-mehâdimi’l-kirâm Mehmed Bey ve Mustafa Bey taraflarından tefvîz-i âti’l-beyân ve kabz-ı semeni ikrâra vekîl olup hasm-ı şer‘î-i câhid mahzarında Zülfikār Çavuş b. Abdülmennân ve Yusuf Bey b. Abdullah şehâdetleriyle vekâleti şe‘ran sâbite olan fahrü’l-akrân el-Hâc Yusuf Bey b. Abdullah meclis-i şer‘-i hatîr-i lâzımü’t-tevkīrde hâlen vezîr-i a‘zam müşîr-i efham, nizâmü’l-âlem, müdebbir-i umûri’l-cumhûr bi’l-fikri’s-sâkıb, mütemmim-i mehâmmü’l-ümem bi’r-re’yi’s-sâ’ib Mehmed Paşa -yesserallâhu mâ yeşâ’- hazretlerinin kethüdâları olup işbu kitâb-ı sedâd-intisâbın hâfızı umdetü’l-emâsil [27a ] ve’l-a‘yân zübdetü’l-e‘âzım ve’l-erkân Receb Ağa hazretleri taraf-ı karînü’ş-şereflerinden vech-i âtî üzre tasdîke vekîl olup Şaban Halîfe b. Kenan ve Zülfikār Çavuş b. Abdülmennân şehâdetleri ile vekâleti sâbite olan fahrü’l-akrân Osman Bey b. Mahmud mahzarında bi’l-vekâle ikrâr ve takrîr-i kelâm edip merhûm [ve] mağfûrun-leh Ferruh Kethüdâ’nın arâzi-i mevkūfesinden Medîne-i Ebâ Eyyûb-i Ensârî -radiye anhu Rabbühü’l-Bârî-’de Taşlıburun nâm mevzi‘de vâki‘ iken iki tarafdan yine vezîr-i müşârün-ileyh hazretlerinin çayırına ve bir taraf[dan] müşterî-i mûmâ-ileyh çayırına ve bir tarafdan tarîk-i âma müntehî beher sene cânib-i vakf-ı mezbûra iki bin akçe mukāta‘ası olan iki su kuyusunu ve eşcâr-ı müsmireyi hâvî bir kıt‘a bostan yerinin hakk-ı tasarrufunu mütevellî-i vakf-ı mezbûr ma‘rifetiyle müvekkil-i mûmâ-ileyh Receb Ağa hazretlerine kırk bin akçe olmak üzre beş yüz kıt‘a riyâlî guruşa tefvîz ve ol dahi vech-i mübeyyen üzre tefevvuz ve kabûl ettikden sonra mukābele-i tefvîzde olan mezbûrü’n-na‘t beş yüz kıt‘a riyâlî guruşu müvekkilân-ı merkūmân Mehmed Bey ve Mustafa Bey müvekkil-i müşârün-ileyh Receb Ağa hazretlerinin yedinden bi’t-tamâm ve’l-kemâl ahz u kabz eylediler ba‘de’l-yevm mârrü’z-zikr bir kıt‘a bostan yeri müşârün-ileyh Receb Ağa hazretlerinindir, sâir emsâli gibi tasarruf etsin dedikde vekîl-i mezbûr el-Hâc Yusuf Bey’in minvâl-i muharrer üzre bi’l-vekâle cârî ve sâdır olan ikrâr ve takrîrini vekîl-i mersûm Osman Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ve imlâ olundu. Hurrire fi’l-yevmi’s-sânî ve’l-ışrîn min şehri Rebî‘ilâhir li sene 1054. Şuhûdü’l-hâl: Şaban Halîfe b. Kenan el-Mütevellî, Arnavud Ali Bey el-Cündî, Mehmed Ağa b. Abdülmennân, Abdi Çavuş b. Nasuh Ağa el-Bevvâbü’s-sultânî, Ahmed Bey b. Abdullah, Mahmud Bey b. Abdullah, Cafer Ağa b. Abdülmennân, Murad Ağa b. Abdürrahim, Kasım Çelebi b. ( ) el-Câbi ve gayruhüm