Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 143 Hüküm no: 139 Orijinal metin no: [27a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kurşuncu Hasan Beşe’nin evini Veli b. Ali’ye sattığı Kurşuncu Hasan Beşe b. Tevekkül nâm kimesne meclis-i şer‘-i şerîfde -Allahü te‘âlâ tağyîr ve tahrîfden korusun- ikrâr ve i‘tirâf edip bu akdin sudûruna değin mülkünde ve yedinde ve taht-ı tasarrufunda olup Ebû Eyyûb el-Ensârî -aleyhi rahmetü Rabbihi’l-Bârî- mahallâtından Süleyman Subaşı mahallesinde vâki‘ bir tarafdan Mahmud Beşe b. Abdullah mülkü ve bir tarafdan Musa b. Abdullah mülkü ve bir tarafdan Mustafa Beşe b. Receb mülkü ve bir tarafdan tarîk-i âm ile mahdûd iki beyt-i ulvîyi ve sofayı ve ahırı ve müşterek su kuyusunu ve zât-ı eşcâr-ı müsmire ve gayr-ı müsmire cüneyneyi müştemil olan cemî‘ menzilini cümle tevâbi‘ ve levâhıkı ve âmme-i merâfık ve menâfi‘i ile kadri ve nisâbı diyâr-ı Rûmiyye’de râyic riyâlî guruş ta‘bîr olunur harbî sikke ile meskûk iki yüz elli kıt‘a-i fıddî semen-i mu‘ayyen-i makbûza hâmil-i hâze’l-kitâb Veli b. Ali’ye bey‘ ettikde ol dahi kendi malı ile nefsi için iştirâ eylemeğin tarafeynden îcâb ve kabûlü ve cânibeynden bedeleyni teslîm ve tesellümü müştemil bey‘ ve şirâ-i bâtt-ı sahîhayn-i şer‘iyyeyn olmağın ikrâr-ı sahîh-i şer‘î ve i‘tirâf-ı sarîh-i mer‘î eyledikde müşterî-i mezbûr kıbelinden vicâhen ve şifâhen tasdîk olunmağın [kayd olundu]. Cerâ zâlike ve hurrire fi’l-yevmi’s-sânî ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Yusuf Ağa b. Abdullah el-Cündî, Hüseyin Efendi b. Abdullah el-İmâm, Bayram Halîfe b. ( ) el-Müezzin, Ahmed Çelebi b. Attâr Yusuf, Yusuf Çelebi b. Hüseyin er-Râcil, Hasan Beşe b. Hüseyin, Mehmed Çelebi b. Ali er-Râcil, Mustafa Beşe b. Kurşuncu ( ), Ahmed Çelebi b. Mustafa, Mehmed Çelebi b. Hasan er-Râcil, Süleyman Çelebi b. Mustafa ve gayruhüm mine’l-hâzırîn