Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 144 Hüküm no: 141 Orijinal metin no: [27b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kara Mustafa Ağa’nın Küçükköy civârında açtığı kuyulardan çıkan suyun İstanbul’daki evine akıtılması için yapılan keşfe dâir [Derkenâr:] Kara Mustafa Ağa’nın (…) hüccetidir. Mahmiye-i Kostantıniyye -humiyet ani’l-âfât ve’l-beliyye- mahallâtından Emir Buhârî -aleyhi’r-rahmetü Rabbihi’l-Bârî- mahallesi kurbunda Hâce Veyis mahallesi sükkânından hâlen vezîr-i a‘zam müşîr-i efham, nizâm-ı âlem, müdebbir-i umûr-ı cumhûr bi’l-fikri’s-sâ’ib, mütemmim-i mehâmmi’l-enâm bi’r-re’yi’s-sâkıb Mehmed Paşa -yesserallâhu mâ yetemennâ ve yeşâ’- hazretlerinin muhzırbaşılığı hizmeti ile müşerref ve mükerrem olan umdetü’l-emâcid ve’l-efâhim, zübdetü’l-e‘âzım ve’l-ekârim işbu kitâb-ı sıhhat nisâbın hâfızı olan Kara Mustafa Ağa hazretlerinin taraf-ı izzet-şereflerinden husûs-ı âti’z-zikre vekîl olup bimâ hüve tarîku’n-nehci’ş-şer‘î vekâleti sâbite olan fahrü’l-emâsil ve’l-akrân makbûlü’s-sudûr ve’l-erkân Yusuf Subaşı b. Hasan meclis-i şer‘-i hatîr-i lâzımü’t-tevkīr ve’t-teşrîfde bi’l-vekâle takrîr-i kelâm ve ta‘bîr ani’l-merâm edip müvekkilim mûmâ-ileyh Mustafa Ağa mahalle-i mezbûrede vâki‘ menzilinde icrâ için Havâss-ı Aliyye’ye tâbi‘ Suyolcu köyü demekle ma‘rûf olan karye hudûdu ve sınırı dâhilinde lede’l-ahâlî ve’l-cîrân ta‘rîf ve tavsîfden müstağnî olup merhûm ve mağfûrun-leh Sultan Bayezid Hân -tâbe serâhu- hazretlerinin mahmiye-i mezbûreye icrâ eyledikleri mâ-i kesîrü’n-nümânın mecrâsında Küçükköy demekle ma‘rûf ve meşhûr mahalle karîb Dimitraki nâm zimmî tarlası içinde hafr ile âbâr-ı müteferrikadan kendi malı ile cem‘ eylediği mâ-i cârîyi menba‘ından izn-i mütevellî ile müşârün-ileyh -esbağallâhu rahmetehû aleyh- merhûm-ı mezbûr Sultan Bayezid Hân hazretlerinin suyu mecrâsına ber vech-i âdet-i me’lûfe-i kadîme idhâl ve ilhâk ve yine mahmiye-i merkūmede ifrâz için mâ-i mezbûra kable’l-idhâl cânib-i şer‘den keşf ve mu‘âyene ve takdîr olunmak matlûbumdur dedikde savb-ı şer‘den mevlânâ Receb Efendi irsâl olunup ol dahi hâssa su yolu nâzırı olan umdetü’l-emâcid ve’l-ekârim Hasan Ağa b. Abdüddâim tarafından hâssa su yolcularından fahrü’l-akrân el-Hâc Osman b. Mustafa ve el-Hâc Kurd b. ( ) ve zeyl-i kitâbda mastûrü’l-esâmî olan müslimîn ile mahall-i ma‘hûda varıp müşâhede ve mu‘tâd üzre vezn ve takdîr eylediklerinde zikr olunan mâ-i mezbûr bir masura vezn ve takdîr olunup sâlifü’z-zikr Sultan Bayezid Hân -aleyhi’r-rahmetü ve’l-gufrân- hazretlerinin su yolu mecrâsına idhâl ve ilhâk olunduğunu müşâhede eylediklerinden sonra mârrü’z-zikr bir masura suyun buçuk masurasın cânib-i vakfa hakk-ı mecrâ ve mürûr için ibkā edip ve buçuk masurasını mûmâ-ileyh Mustafa Ağa murâd eylediği mahalden ifrâz edip mârrü’z-zikr menziline icrâya izin ve icâzetlerini mevlânâ-yı mezbûr mahallinde ketb ü tahrîr ba‘dehû gelip meclis-i şer‘a vukū‘u üzre ihbâr ve takrîr eylemeğin mâ hüve’l-vâki‘ alâ vukū‘ihî bi’t-taleb ketb ve terkīm olundu. Tahrîren fi’l-yevmi’s-sâlis ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Umdetü’l-meşâyihi’l-izâm eş-Şeyh Mehmed Efendi el-vâ‘iz fî Ayasofya-i kebîr, Fahrü’l-müderrisîni’l-kirâm Veli Efendi b. Nasuh Efendi, Fahrü’l-hutebâ Ahmed Efendi b. Sinan, Süleyman Efendi el-İmâm, Fahrü’l-müderrisîn Abdullah Efendi, es-Seyyid Ömer Çelebi b. es-Seyyid Hüseyin el-Müezzin, Mehmed b. Ahmed imâm-ı Mesih Paşa, Mehmed Ağa b. Hasan bölük sekizinci, Bâli Çavuş b. Abdullah, Ali Çelebi b. Hüseyin el-Kâtib, Mustafa Çelebi b. Ali, Ali Halîfe el-Kâtib, Halil b. Ahmed, Yusuf b. Abdullah, Hasan Çelebi b. Şâtır, Şaban b. Ahmed er-Râcil ve gayruhüm mine’l-huzzâr