Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 145 Hüküm no: 142 Orijinal metin no: [27b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Koçi Bey b. Yakub’un tasarrufundaki tarlayı Ali b. Kasım ve Laska v. Manol’e devrettiği Vilâyet-i Rumeli’nde Avlonya sancağında Premedi kazâsına tâbi‘ Kurteş nâm karye sükkânından Koçi Bey b. Yakub meclis-i şer‘-i şerîf-i lâzımü’t-tevkīr ve’t-teşrîfde işbu râfi‘ayi’l-kitâb Ali b. Kasım ve Laska v. Manol muvâcehelerinde bi’t-tav‘i’s-sâf ikrâr ve i‘tirâf ve takrîr-i kelâm edip karye-i mezbûre sınırı ve hudûdu dâhilinde vâki‘ iki tarafdan müşteriyân-ı mezbûrân tarlaları ve iki tarafdan tarîk-i âm ile mahdûd bir dip ceviz ağacını hâvî olup tahmînen ( ) keyl tohum isti‘âb eden tarlamın hakk-ı tasarrufunu sâhib-i arz ma‘rifetiyle mezbûrân Ali ve Laska’ya iştirâk-i seviy tarîki üzre üç bin beş yüz ceyyid ve cedîd râyic fi’l-vakt akçeye ferâğ ve tefvîz edip onlar dahi ber vech-i muharrer tefevvuz ve kabûl eylediklerinden sonra mukābele-i ferâğ ve tefvîzde olan üç bin beş yüz mezbûrü’n-na‘t akçeyi yedlerinden bi’t-tamâm ve’l-kemâl ahz u kabz eylediğimden sonra mârrü’z-zikr tarlayı mahallinde tesellüm ve tasarrufa merkūmân Ali ile Laska’yı taslît eyledim, ba‘de’l-yevm tarla-yı mahdûd mülk-i müfavvazıdır ve hakk-ı sahîh ve sarîhleridir emsâli tasarrufu gibi mutasarrıf olsunlar dedikde mukırr-ı mezbûru ikrâr-ı muharrer ve meşrûhunda el-mukarru lehümâ bi’l-muvâcehe tasdîk ve bi’l-müşâfehe tahkīk eylemeğin işbu hurûf mâ vaka‘a bi’t-taleb ketb ve terkīm olundu. Tahrîren fi’l-yevmi’s-sâdis ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Fahrü’l-akrân Durmuş Bey b. Yakub, İbrahim Beşe b. Sinan, Mustafa Çavuş b. Mehmed Bey, Ali Beşe b. Mustafa, Hüseyin Çelebi b. Ali, Baba Süleyman b. Turgud ve gayruhüm mine’l-hâzırîn