Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 146 Hüküm no: 143 Orijinal metin no: [28a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Efendi b. Yahya Efendi ile komşusu Ahmed Halîfe’nin evlerine yaptıkları ilâvelerin zararı konusunda birbirlerinden şikâyetçi olmaları üzerine keşif yapıldığı ve şikâyet konusu olan yapıların kaldırılmasına dâir Husûs-ı âti’l-beyânın mahallinde keşf ve tahrîr olunması iltimâs olunmağın savb-ı şer‘den mevlânâ Hidâyetullah Efendi ve hâssa mi‘mârlardan fahrü’l-eşbâh Üstâd Mustafa b. Abdülmennân irsâl olunup onlar dahi zeyl-i kitâbda mastûrü’l-esâmî olan müslimîn ile medîne-i Ebâ Eyyûb-i Ensârî -aleyhi rahmetü Rabbühü’l-Bârî-de merhûm Zal Mahmud Paşa Câmi‘-i şerîfi kurbunda vâki‘ sâbıkan Yenişehir kadısı olan umdetü ulemâ’i’l-izâm zübdetü fuzalâ’i’l-kirâm Ahmed Efendi b. el-merhûm el-mağfûr -ed-dâric ilâ medârici rahmeti Rabbihi’l-Gafûr- Yahya Efendi hazretlerinin menziline varılıp akd-i meclis eylediklerinde müşârün-ileyh Ahmed Efendi meclis-i mezbûrda câr-ı mülâsıkı olup ebnâ-i sipâhiyândan silahdârân zümresinin bi’l-fi‘l kâtibi olan bâ‘isü’l-kitâb fahr-i erbâbü’t-tahrîr ve’l-kalem zahr-ı ashâbü’t-takrîr ve’r-rakam Ahmed Halîfe mahzarında üzerine da‘vâ ve takrîr-i kelâm edip mûmâ-ileyh Ahmed Halîfe hâlen sâkin olduğu menzil dâhilinde müceddeden fevkānî bir oda binâ ve ihdâs etmişdir, zikr olunan odanın benim sâkin olduğum menzilimin içeri ve taşrasına havâle-i külliyyesi olduğundan mâ‘adâ menzilimin içerisinde vâki‘ merhûme ( ) Hâtun vakfından olup icâre-i mu‘accele ve yevmî bir akçe ücret-i müeccele ile tasarrufumda olup menzilime ilhâk eylediğim bir bâb tahtânî odanın saçakların kat‘ edip saçağı altında müceddeden bir matbah binâ ve ihdâs eylemişdir, keyfiyyet-i hâl merkūm Ahmed Halîfe’den suâl olunup takrîri tahrîr olunması matlûbumdur dedikde gıbbe’s-suâl ve akībe’l-istintâk merkūm Ahmed Halîfe dahi feth-i makāl edip müşârün-ileyh Ahmed Efendi dahi benim mülk menzilimin taş duvarı içine bir kebîr küp vaz‘ eyledikden mâ‘adâ duvarıma muttasıl müceddeden bir köşk binâ ve ihdâs edip benim mülk taş duvarıma mismâr kakmak ile ziyâde zarar etmişdir üzerine varılıp keşf ve tahrîr olunması matlûbumdur dedikde mi‘mâr-ı mezbûr ve ebniye ve sukūf ahvâline küllî şu‘ûru ve vukūfu olan bî-garaz müslimîn ile mahall-i mezbûra varıp mu‘âyene ve müşâhede eylediklerinde fi’l-hakīka merkūm Ahmed Halîfe’nin müceddeden binâ ve ihdâs eylediği köşkün havâlesini kestane tahtasıyla def‘ ve zikr olunan odayı dahi vaz‘-ı kadîmden adem-i tecâvüzü üzre tenbîh eyledikden sonra müşârün-ileyh Ahmed Efendi hazretlerinin dahi ihdâs eylediği köşkün zararını def‘ ve mezbûr Ahmed Halîfe’nin duvarı içine vaz‘ eylediği su küpünü def‘ etmek üzre her birine tenbîh eylemeğin mevlânâ-yı mezbûr vâki‘ hâli mahallinde tahrîr ba‘dehû gelip meclis-i şer‘de alâ vukū‘ihî ihbâr etmeğin mâ hüve’l-vâki‘ gıbbe’t-taleb ketb ve imlâ olundu. Hurrire fi’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Fahrü’l-akrân Hasan Çelebi b. Hüseyin el-Cündî, Zahrü’l-eşbâh Sâ‘atçizâde Mehmed Çelebi er-Râcil, Şaban Halîfe b. Kenan el-Mütevellî, Mehmed Çelebi b. Veli, Mehmed Beşe b. Yusuf, el-Hâc Ahmed Beşe Çukadâr, İbrahim Çelebi b. Mustafa el-Muhzır, Fahrü’l-akrân Veli Bey el-Cündî ve gayruhüm mine’l-huzzâr