Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 148 Hüküm no: 145 Orijinal metin no: [28b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kanile v. Yani’nin Yani v. Dimitri’ye bostan yeri ile dut ağaçlarını sattığı ve iki tarlanın tasarruf hakkını devrettiği Vilâyet-i Rumeli’nde Mora sancağında Kalavrita kazâsına tâbi‘ Necros? nâm karye sâkinlerinden Kanile v. Yani nâm zimmî meclis-i şer‘-i hatîr-i lâzımü’t-tevkīrde işbu hâmil-i hâze’l-kitâb Yani v. Dimitri muvâcehesinde bi-tav‘ihî ikrâr ve takrîr-i kelâm edip akd-i âtî sudûruna değin silk-i mülkümde münselik olan emlâkden karye-i mezbûre kurbunda vâki‘ bir tarafı Dimitri v. Marmara bostanı ve bir tarafı Yani v. Şitoki bostanı ve bir tarafdan Anaştaş v. ( ) bostanı ve tarîk-i âm ile mahdûd bir kıt‘a bostan yerini ve mevâzi‘-i müteferrikada vâki‘ yedi dip dut eşcârını merkūm Yani’ye sekiz yüz cedîd ve ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve kabz-ı semen edip zikr olunan mebî‘leri mahallinde kabza müşterî-i merkūmu taslît eylediğimden sonra yine karye-i mezbûre sınırı dâhilinde Paskal nâm mevzi‘de vâki‘ bir tarafdan Minho v. ( ) tarlasına ve bir tarafdan Yani v. Dimitri tarlasına ve bir tarafdan Kondi v. Yorgi tarlasına ve bir tarafdan vâdiye müntehî bir kıt‘a tarla ve yine harman altında vâki‘ bir tarafı Dimitri v. ( ) bağı ve bir tarafı İstemad v. ( ) bağı ve bir tarafı Petro [v.] Kozi tarlası ve bir tarafı Kiryazi v. ( ) bostanı ile mahdûd bir kıt‘a tarla tahmînen sekiz keyl tohum isti‘âb eder iki kıt‘a tarlanın hakk-ı tasarrufunu sâhib-i ar[z] ma‘rifetiyle merkūm Yani’ye bin dört yüz kırk nakd-i mezbûrü’n-na‘t akçeye tefvîz ve ol dahi vech-i mübeyyen üzre tefevvuz ve kabûl ettikden sonra mukābele-i tefvîzde olan meblağ-ı mersûmu mezkûr Yani yedinden bi’t-tamâm ve’l-kemâl ahz u kabz eyledim ba‘de’l-yevm zikr olunan iki kıt‘a tarla mersûmundur sâir emsâli tasarrufu gibi mutasarrıf olsun dedikde mukırr-ı mezbûrun vech-i mübeyyen üzre cârî olan ikrâr ve takr[îr]ini el-mukarru lehü’l-mezbûr Yani bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ ve’l-ışrîn şehri Rebî‘ilâhir min şühûri sene erba‘a ve hamsîn ve elf. Şuhûdü’l-hâl: Mustafa Beşe b. Abdullah bostancı, Mustafa Beşe b. Mehmed el-Muhtesib, Ali Beşe b. Mustafa el-Muhzır, Hasan Çelebi b. Ali, Marina v. Minho, Dimitri [v.] Andriye, İspilyot [v.] İstemad, Yorgi [v.] Apostol, Todori [v.] İstemad ve gayruhüm mine’l-huzzâr