Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 149 Hüküm no: 146 Orijinal metin no: [28b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cuma b. Mehmed’in zevcesi Sâliha bt. Abdullah’ı mehir ve iddet nafakasını vererek üç talâk ile boşadığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından İdrisköşkü mahallesinde sâkin işbu râfi‘ü’l-kitâb Cuma b. Mehmed nâm kimesne meclis-i şer‘-i hatîr-i lâzımü’t-tevkīrde zevcesi olan Sâliha bt. Abdullah nâm hâtunu ihzâr ve mahzarında takrîr-i kelâm edip mezbûrenin mehr-i müeccelinden zimmetimde olan üç yüz akçesini ve yüz elli akçe nafaka-i iddetini mezkûre Sâliha Hâtun’a verip talâk-ı selâse ile mezbûreyi tatlîk eyledim ve birbirimiz ile zevciyyete müte‘allik da‘vâ ve nizâ‘ımız kalmadı deyicek mezbûr Sâliha Hâtun dahi zikr olunan meblağı ahz u kabz ettim ve mezbûr Cuma ile benim dahi vechen mine’l-vücûh da‘vâ ve nizâ‘ım yokdur şöyle ki ba‘de’l-yevm zevciyyetime müte‘allik asâleten [ve] vekâleten da‘vâ sudûr ederse lede’l-hükkâmi’l-kirâm mesmû‘a olmaya dedikde tarafeynin kelimâtı bi’t-taleb ketb ve terkīm olundu. Hurrire fi’l-yevmi’s-sâbi‘ ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Ali Beşe b. Mustafa ve Mustafa b. Mehmed, Süleyman b. Turgud, Süleyman Çelebi b. Ali, Musa b. Mehmed ve gayruhüm mine’l-huzzâr