Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 149 Hüküm no: 147 Orijinal metin no: [28b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Angeli’nin İstemad’ın çocukları Kosta, Yando, Dimitri ve Petro’ya menzilini sattığı ve tasarrufundaki on tarlasını devrettiği Vilâyet-i Rumeli’nde Mora sancağında Kartine kazâsına tâbi‘ Vardariçe nâm karye sâkinlerinden Nikola v. Angeli meclis-i şer‘de işbu ashâbü’l-kitâb Kosta ve Yando ve Dimitri ve Petro evlâd-ı İstemad muvâcehelerinde bi-tav‘ihî ikrâr ve takrîr-i kelâm edip akd-i âtî sudûruna değin silk-i mülkümde münselik olan emlâkden karye-i mezbûrede vâki‘ bir tarafdan Anastas v. Yorgi mülküne ve bir tarafdan İbrahim b. Mehmed mülküne ve bir tarafdan Yani [v.] Rafet mülküne ve bir tarafdan tarîk-i âma müntehî bir bâb beyt-i ulvîyi ve mahzeni ve bostan yerini ve havluyu müştemil mülk menzilimi ve yine karye-i mezbûre bağları dâhilinde vâki‘ bir tarafdan İbrahim b. Mehmed bağına ve bir tarafdan Behram b. Kasım mülküne ve bir tarafdan Todori bağına ve bir tarafdan tarîk-i âma müntehî bir kıt‘a bağ ve yine bir tarafdan Papa Panayot bağına ve bir tarafdan Todi bağına ve iki tarafdan tarîk-i âma müntehî bir kıt‘a bağ ki tahmînen altı çapalık iki kıt‘a mülk bağımı cümle tevâbi‘ ve levâhıkı ile bi-safkatin vâhidetin ale’l-iştirâki’s-seviy mezkûrûn Kosta ve Yando ve Dimitri ve Petro’ya iki bin cedîd ve ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve ol dahi vech-i mübeyyen üzre iştirâ ve tesellüm ettikden sonra semeni olan meblağ-ı mezbûrü’n-na‘t akçeyi merkūmûn yedlerinden bi’t-tamâm ve’l-kemâl ahz u kabz edip zikr olunan mebî‘leri mahallinde kabza müşteriyûn-ı merkūmûnu [29a ] taslît ettiğinden sonra yine karye-i mezbûre sınırı dâhilinde mevâzi‘-i müteferrikada vâki‘ inde ahâliyi’d-diyâr her biri ma‘lûmü’l-hudûd ve’l-mikdâr tahmînen iki müd tohum isti‘âb eder on kıt‘a tarlanın dahi [hakk-ı] tasarrufunu sâhib-i arz ma‘rifetiyle merkūmûna tefvîz ve onlar dahi ale’l-iştirâki’s-seviy tefevvuz ve kabûl ettiklerinden sonra mukābele-i tefvîzde olan bin nakd-i mezbûrü’n-na‘t akçeyi mezbûrûn Kosta ve Yando ve Dimitri ve Petro yedlerinden bi’t-tamâm ve’l-kemâl ahz u kabz edip mârrü’z-zikr on kıt‘a tarlayı mahallinde kabz ve tasarrufa mezkûrûnu taslît eyledim, ba‘de’l-yevm zikr olunan tarlalar ale’l-iştirâki’s-seviy mersûmûnun[dur] sâir emsâli tasarrufu gibi mutasarrıf olsunlar dedikde mukırr-ı mezbûrun vech-i mübeyyen üzre cârî olan ikrâr ve takrîrini el-mukarru lehü’l-merkūmûn bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’r-râbi‘ ve’l-ışrîn min Rebî‘ilâhir li sene erba‘a ve hamsîn ve elf. Şuhûdü’l-hâl: Sinan b. Sadân, Ali b. Abdullah, Receb b. Abdullah, Ali Beşe b. Mustafa, Musa b. Mehmed, Hamza Beşe b. Ali er-Râcil ve gayruhüm mine’l-huzzâr