Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 152 Hüküm no: 150 Orijinal metin no: [29b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgaki v. Dimitraki’nin Yani v. İstemad ile Zafir v. Panayot’a menzil ile iki bağdaki hisselerini sattığı Mahmiye-i İstanbul hısnı ebvâbından Kumkapısı dâhilinde Çadırcı Ahmed mahallesinde sâkin Yorgaki v. Dimitraki nâm zimmî meclis-i şer‘-i hatîr-i lâzımü’t-tevkīrde işbu hâmileyi’l-kitâb Yani v. İstemad ve Zafir v. Panayot muvâcehesinde bi-tav‘ihî ikrâr ve takrîr-i kelâm edip Havâss-ı Aliyye kazâsı müzâfâtından Küçükçekmece nâhiyesine tâbi‘ Ayastefanos nâm karyede vâki‘ bir tarafdan Hristo v. Paskal mülküne ve bir tarafdan babamız oğlu Hristodulo mülküne ve bir tarafdan Hriskolo mülküne ve bir tarafdan tarîk-i âma müntehî fevkānî ve tahtânî büyût-ı adîdeyi ve ahırı ve mahzeni ve şırahâneyi ve eşcâr-ı müsmire ve gayr-ı müsmire hadîkayı müştemil mülk-i mevrûsum olan menzilden ve yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd olup mülk-i mevrûsum olan iki kıt‘a bağdan hisse-i şer‘iyye-i şâyi‘amı ale’l-iştirâki’s-seviy merkūmân Yani ve Zafir’e doksan beş kıt‘a riyâlî guruşa bey‘-i bâtt-ı sahîh-i şer‘î ile bey‘ ve teslîm ve onlar dahi ale’l-iştirâk iştirâ ve tesellüm eylediklerinden sonra semeni olan meblağ-ı mersûm doksan beş kıt‘a riyâlî guruşu merkūmân Yani ve Zafir yedlerinden bi’t-tamâm ve’l-kemâl ahz u kabz eyledim ba‘de’l-yevm zikr olunan menzil ve bağdan hisse-i şer‘iyye-i şâyi‘am ale’l-iştirâki’s-seviy merkūmân Yani ve Zafir’in mülk-i müşterâ-yı sarîhleridir dedikden sonra yine karye-i mezbûre sınırı dâhilinde vâki‘ lede’l-ahâlî ma‘lûmü’l-hudûd iki kıt‘a tarladan dahi hisse-i şer‘iyye-i şâyi‘amın hakk-ı tasarrufunu sâhib-i arz ma‘rifetiyle ale’l-iştirâk tefevvuz ve kabûl ettikden sonra mukābele-i tefvîzde olan beş kıt‘a riyâlî guruşu merkūmân Yani ve Zafir yedlerinden tamâmen ahz u kabz eyledim min ba‘d mârrü’z-zikr iki kıt‘a tarlada olan hisse-i şer‘iyye-i şâyi‘am merkūmânındır, sâir emsâli tasarrufu gibi mutasarrıf olsunlar dedikde mukırr-ı mezbûr Yorgaki’nin vech-i mübeyyen üzre cârî ve sâdır olan ikrâr ve takrîrini el-mukarru lehüma’l-mezbûrân Yani ve Zafir bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâdis ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Fahrü’l-kuzât Ali Efendi, Mustafa Beşe el-Muhtesib, Ali Beşe el-Muhzır, muharriru’l-hurûf Hidâyetullah, Nikola [v.] Şigalo?, Panayot v. Polihroni, Kosta v. Harito, Polihroni v. Nikola, Yani v. Dimitri ve gayruhüm