Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 155 Hüküm no: 155 Orijinal metin no: [30a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Niko v. Verana’nın tasarrufundaki tarlayı dâmâdı Andriye v. Dedo’ya devrettiği Vilâyet-i Rumeli’nde Ergirikasrı kazâsına tâbi‘ Pesfoyi? nâm karyede sâkin Niko v. Verana nâm zimmî meclis-i şer‘-i hatîr-i lâzımü’t-tevkīrde işbu râfi‘ü’l-kitâb dâmâdı Andriye nâm zimmî tarafından ikrâr-ı âti’z-zikri tasdîke vekîl olup bimâ hüve nehcü’s-sübût vekâleti şer‘an vekâleti sâbite olan babası Dedo v. Kika nâm zimmî muvâcehesinde bi’t-tav‘i’s-sâf ikrâr ve takrîr-i kelâm edip karye-i mezbûre sınırında vâki‘ bir tarafı Kino v. Mano ve bir tarafı Yano v. Lazo ve bir tarafı Dimo v. Londi nâm zimmîler tarlaları ve taraf-ı âhiri vâdi ile mahdûd olup tahmînen iki keyl tohum isti‘âb eder tarlamın hakk-ı tasarrufunu sâhib-i arz ma‘rifetiyle dâmâdım mezbûr Andriye’ye iki bin cedîd ve ceyyid râyic fi’l-vakt akçeye tefvîz edip ol dahi vech-i muharrer üzre tefevvuz ve kabûl ettikden sonra mukābele-i tefvîzde olan meblağ-ı mezbûru yedinden bi’t-tamâm ve’l-kemâl ahz u kabz edip zikr[i] sebk eden tarlayı mahallinde tasarrufa mersûm Andriye’yi taslît eyledim ba‘de’l-yevm tarla-yı mahdûd-ı mezbûr mülk-i müfavvazıdır sâir emsâli gibi keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i muharrer üzre sâdır ve cârî olan ikrâr ve takrîrini vekîl-i mezbûr Dedo vicâhen tasdîk ve şifâhen tahkīk etmeğin mâ hüve’l-vâki‘ bi’t-taleb ketb olundu. Tahrîren fî selhi Rebî‘ilâhir li sene erba‘a ve hamsîn ve elf. Şuhûdü’l-hâl: Dimo v. İstado, İstado v. Yani, Bano v. Şogari, Yani v. Todori, Dimo v. Lajo, Vaso v. Dimo ve gayruhüm mine’l-huzzâr