Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 156 Hüküm no: 156 Orijinal metin no: [30b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kosta v. Yani’nin menzildeki üçte bir hissesini Todori v. Kosta’ya sattığı Vilâyet-i Rumeli’nde Mizistre kazâsına tâbi‘ Kastenciye nâm karye sâkinlerinden Kosta v. Yani nâm zimmî meclis-i şer‘-i hatîr-i lâzımü’t-tevkīrde yine karye-i mezbûrede işbu hâmil-i hâze’l-kitâb Todori v. Kosta nâm zimmî muvâcehesinde bi’t-tav‘ ve’r-rızâ ikrâr ve takrîr-i kelâm edip karye-i mezbûrede vâki‘ bir tarafdan İstemad v. Simav mülküne ve bir tarafdan Yorgi v. Palanyo mülküne ve bir tarafdan Yani v. Zografo mülküne ve bir tarafdan Nikola v. Lobra mülküne müntehî fevkānî beyti ve ahırı ve havluyu müştemil mülk-i mevrûsum olup üç sehim i‘tibâr olunan menzilden sülüsân hisse-i şer‘iyye-i şâyi‘amı bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mezbû[r] Todori’ye otuz yedi buçuk riyâlî guruşa bey‘ ve kabz-ı semen edip mezkûru mahallinde kabza müşterî-i merkūmu taslît eyledikden sonra semeni olan meblağ-ı mezbûru mukaddemâ merkūm Todori’ye zimmetime edâsı lâzım otuz yedi buçuk riyâlî guruş deynime takās eyledim ba‘de’l-yevm menzil-i mahdûd-ı mezkûrdan sülüsân hisse-i şer‘iyye-i şâyi‘ası merkūm Todori’nin mülk-i müşterâ-yı sarîhidir keyfe mâ yeşâ’ ve hasbe mâ yürîd mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Todori bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ gıbbe’l-ibtigā sebt ve imlâ ve tahrîr-i inşâ olunup men lehü’t-taleb yedine vaz‘ olundu. Hurrire fî selhi şehri Rebî‘ilâhir li sene erba‘a ve hamsîn ve elf. Şuhûdü’l-hâl: Hasan b. Hüseyin, Mustafa Beşe b. Mehmed, Baba Süleyman b. Turgud, Ali Beşe b. Mustafa, Papalgori v. Papa Yani, Yorgi v. Yani, Todori v. Yani, Manol v. Yorgi ve gayruhüm mine’l-huzzâr