Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 157 Hüküm no: 157 Orijinal metin no: [30b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Dimitri ile kardeşi Dimitri’nin menzillerini Kosta v. Lambo’ya sattıkları Vilâyet-i Rumeli’nde Tırhala sancağında Yenişehir kazâsı müzâfâtından Fener nâhiyesine tâbi‘ Kublaş nâm karye sâkinlerinden olup kendi tarafından ve li ebeveyn karındaşı Dimitri nâm zimmî tarafından bey‘-i âti’z-zikri ikrâra vekîl olup hasm-ı şer‘î ve câhid mahzarında vekâleti Yani v. Atanaş ve Dimo v. Yani şehâdetleriyle şer‘an sâbite olan Todori v. Dimitri meclis-i şer‘-i hatîr-i lâzımü’t-tevkīrde işbu hâmilü’l-kitâb Kosta v. Lambo muvâcehesinde asâleten [ve] vekâleten ikrâr ve i‘tirâf ve takrîr-i kelâm edip akd-i âtî sudûruna değin silk-i mülk-i sahîhimde münselik olup karye-i mezbûrede vâki‘ bir tarafdan yine bizim mülk menzilimize ve bir tara[fdan] Andriye v. Yani mülküne ve bir tarafdan Aleksi v. Doros ve bir tarafdan Badoş v. Londi çayırına müntehî bir bâb fevkānî beyti ve altında ahırı ve iki dip ceviz ağacını hâvî muhavvatayı ale’l-iştirâki’s-seviy mutasarrıf olduğumuz mülk menzilimizi cümle tevâbi‘ ve levâhıkı ve kâffe-i menâfi‘ ve merâfıkı ile bi-safkatin vâhidetin mezbûr Kosta’ya beş bin beş yüz ceyyid ve cedîd râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve ol dahi ber vech-i meşrûh iştirâ ve tesellüm eyledikden sonra semen-i mezbûr beş bin beş yüz akçeyi bi’t-tamâm ve’l-kemâl yedinden bi’l-asâle ve bi’l-vekâle ahz u kabz edip ve mârrü’z-zikr menzil-i mahdûd[u] mahallinde ahz u kabza müşterî-i mersûm Kosta’yı taslît eyledim ba‘de’l-yevm menzil-i merkūm Kosta’nın mülk-i müşterâ-yı sahîh ve sarîhidir keyfe mâ yeşâ’ ve yürîd bilâ-nizâ‘ min karîb ev ba‘îd mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb ü tahrîr olundu. Hurrire fî selhi Rebî‘ilâhir li sene erba‘a ve hamsîn ve elf. Şuhûdü’l-hâl: İskarlet v. Dimitri, Franko v. Todori, Aleksi v. Paros, Yorgi v. İskarlet, Nikola v. Aleksandra, Tanaş v. Ergiri, İsterye v. Papas, Armağan v. Andriye, Harto v. Andron, Anayot v. Papa Yorgi ve gayruhüm