Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 157 Hüküm no: 158 Orijinal metin no: [30b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstavroz v. Manol’ün zevcesinden miras kalan bağı Mustafa Bey b. Kasım’a sattığı Medîne-i Ebâ Eyyûb el-Ensârî -aleyhi rahmetü Rabbihi’l-Bârî- müzâfâtından Avasya nâm karye sâkinlerinden İstavroz v. Manol meclis-i şer‘-i şerîfde işbu râfi‘ü’l-kitâb fahrü’l-emâsil Mustafa Bey b. Kasım el-Mütekā‘id mahzarında bi’t-tav‘ ve’l-ihtiyâr lâ bi’l-kerh ve’l-icbâr ikrâr ve’l-i‘tirâf edip Sultan Bayezid Hân -[aleyhi] rahmetü Rabbihi’l-müste‘ân- hazretlerinin karye-i merkūmede vâki‘ arz-ı vakfı üzre gars olunan kürûm ve sınır dâhilinde bir tarafdan Riga v. Dini bağı ve bir tarafdan Deli Dimo v. Kodi bağı ve bir tarafdan Dimo v. Nikola bağı ve bir tarafdan tasarrufumda olan tarlaya müntehî üç dönüm i‘tibâr olunup beher sene vakf-ı mezbûr mütevellîsine yirmi dört akçe mukāta‘a-i mu‘ayyenesi olan bağ bundan akdem Yorgi nâm zimmînin mülkü olup mürd olmağın sulbiye kızı zevcem Safire’ye intikāl edip min gayrı veled mezbûre dahi hâlike olmağın irs-i şer[‘] ile bana intikāl eyle[m]işdi el-hâletü hâzihî bağ-ı mahdûd-ı mezbûru bi-cümleti’t-tevâbi‘ ve’l-levâhık ve kâffeti’l-hukūk [31a ] ve’l-merâfık mezbûr Mustafa Bey’e dört bin üç yüz nakd-i râyic fi’l-vakt fıddî akçeye bey‘-i bâtt-ı sahîh-i şer‘î ile bey‘ ve teslîm ve ol dahi iştirâ ve tesellüm eyledikden sonra semen-i mezbûr dört bin akçeyi yedinden bi’t-tamâm ve’l-kemâl ahz u kabz eyledim ba‘de’l-yevm bağ-ı mahdûd-ı mezbûr merkūm Mustafa Bey’in mülk-i müşterâ-yı sahîh ve sarîhidir keyfe mâ yeşâ’ ve hasbe mâ yahtâr bilâ-nizâ‘ min karîb ev ba‘îd mutasarrıf olsun dedikde mukırr-ı mezbûrun ber vech-i muharrer cârî ve sâdır olan ikrâr ve takrîrini el-mukarru lehü’l-mezbûr Mustafa Bey bi’l-muvâcehe tasdîk ve bi’l-müşâfehe tahkīk eylemeğin işbu hurûf mâ vaka‘a bi’t-taleb ketb ve terkīm olundu. Tahrîren fî selhi şehri Rebî‘ilâhir li sene erba‘a ve hamsîn ve elf. Şuhûdü’l-hâl: Hasan b. Hüseyin, Ali b. Sâlih, Usta Mehmed berber, Mehmed Beşe b. Abdullah, Nasuh b. Mehmed, Mustafa Beşe, Ali Beşe b. Mustafa ve gayruhüm