Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 248 Hüküm no: 260 Orijinal metin no: [33a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Abdülkādir’in evini Şerife Âlime bt. es-Seyyid Hasan’a sattığı Dârü’s-saltanati’s-seniyye Kostantıniyye el-mahmiyye’de Camcı Ali mahallesinde sâkin Mustafa Çelebi b. Abdülkādir nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de fahrü’l-muhadderât Şerîfe Âlime bt. es-Seyyid Hasan nâm hâtun mahzarında ikrâr-ı tâm ve ta‘bîr ani’l-merâm edip silk-i mülkümde münselik mahmiye-i mezbûrede el-Hâc İlyas mahallesinde vâki‘ üç tarafdan merkūme Şerîfe Âlime Hâtun mülkü ve bir tarafdan tarîk-i âm ile mahdûd bir beyt-i süflî ve üç taş duvarı muhtevî ahırı cümle tevâbi‘i ve levâhıkı ile mezbûre Şerîfe Âlime Hâtun’a yüz elli kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabûl ve kabz edip semeni olan meblağ-ı mezbûr yüz elli kıt‘a esedî guruşu mezbûre Şerîfe Âlime Hâtun yedinden tamâmen ahz u kabz eyledim ba‘de’l-yevm menzil-i mahdûd-ı mezbûr mezbûre Şerîfe Âlime Hâtun’un mülk-i müşterâsıdır keyfe mâ teşâ’ ve tahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Cumâdelâhire li sene seb‘a ve seb‘în ve elf. Şuhûdü’l-hâl: Ahmed Efendi b. ( ), Mehmed Efendi b. ( ), Şükrullah Bey b. Mustafa, Mustafa Çelebi.