Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 249 Hüküm no: 261 Orijinal metin no: [33a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rûmiye bt. Hacı Sâlim’e, boşandığı kocası Hacı Ömer’den doğacak çocuğu için nafaka tayin edildiği Muhâla‘a ve nafaka bir yerde Mahmiye-i İstanbul’da Seferikoz mahallesi sâkinelerinden Rûmiye bt. Hacı Sâlim nâm hâtun meclis-i şer‘-i hatîr-i lâzımü’t-tevkīrde zevc-i mutallıkı Hacı Ömer b. Hacı Ahmed mahzarında takrîr-i kelâm ve ta‘bîr ani’l-merâm edip zevcim mezbûr Hacı Ömer târih-i kitâbdan bir ay mukaddem beni bâyinen tatlîk eyleyip üç yüz akçe mehr-i müeccel-i müsemmâmı verip ve me’ûnet-i süknâm için elli akçe dahi verdiğinde nafaka-i iddetimden ferâğ etmiş idim, lâkin mezbûr Hacı Ömer’in firâşından hamlim olmağla ferâğ-ı mezbûrum sahîh ve mu‘teber olmamağın suâl olunup iddetim münkaziye olunca mezbûr Hacı Ömer üzerine nafaka takdîr olunmak matlûbumdur dedikde gıbbe’s-suâl mezbûr Hacı Ömer kaziyye şerh ve beyân olunduğu üzre olduğunu bi tav‘ihî ikrâr etmeğin hâkim-i muvakki‘-i sadr-ı kitâb tûbâ-leh hüsnü me’âb hazretleri mezbûre Rûmiye’ye vaz‘-ı haml edip iddeti munkaziye olunca zevci mezbûr Hacı Ömer üzerine târih-i kitâbdan beher yevm beşer akçe nafaka farz ve takdîr edip meblağ-ı mezbûru nafakasına sarf ve vakt-i zarûretde istidâne ve lede’z-zafer mezbûr Hacı Ömer üzerine rücû‘a merkūme Rûmiye’ye izn vermeğin mâ vaka‘a bi’t-taleb ketb olundu. Fi’l-yevmi’l-hâmis min Cumâdelâhire li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, Abdi Çelebi b. Hüseyin, Mehmed Bey b. Ramazan, el-Hâc Mehmed b. Süleyman, el-Hâc Ahmed.