Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 162 Hüküm no: 164 Orijinal metin no: [32a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Bey b. Hamza’nın evini Cafer Beşe b. Abdullah ile zevcesi Fâtıma Hâtun bt. Abdurrahman’a sattığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Davud Ağa mahallesinde sâkin İbrahim Bey b. Hamza nâm cündî meclis-i şer‘-i şerîfde -Allahü te‘âlâ tağyîr ve tahrîfden korusun- hâmileyi hâze’l-kitâb Cafer Beşe b. Abdullah ile mezbûrun zevcesi olan sadriye kızı Fâtıma Hâtun bt. Abdurrahman nâm hâtun kıbelinden tasdîke vekîl olan İsmihân Hâtun bt. Abdullah mahzarında ikrâr ve i‘tirâf edip bu akdin sudûruna değin mülkünde ve yedinde ve taht-ı tasarrufunda olup mahalle-i mezbûrede vâki‘ iki tarafdan bâyi‘-i mezbûr mülkü ve iki tarafdan tarîk-i hâs ve âm ile mahdûd olup iki beyt-i süflîyi ve fırını ve sofayı ve su kuyusunu ve zât-ı eşcâr-ı müsmire ve gayr-ı müsmire cüneyneyi ve kenîfi hâvî olan cemî‘ menzilini cümle tevâbi‘ ve levâhıkı ve âmme-i menâfi‘ ve merâfıkı ile kadri ve nisâbı on bir bin fıddî cedîd ceyyid râyic fi’l-vakt akçe semen-i mu‘ayyen-i makbûza bey‘ edip onlar dahi kendi malları ile ve kendi nefisleri için iştirâ etmeğin bey‘ ve iştirâ-i bâtt-ı sahîhayn-i şer‘iyyeyn olmağın i‘tirâf-ı sahîh-i mer‘î ettikde müşteriyân-ı merkūmân kıbelinden dahi vicâhen tasdîk olunmağın [kayd olundu]. Cerâ zâlike ve hurrire fi’l-yevmi’s-sâmin ve’l-ışrîn min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Mehmed Efendi b. Muharrem el-İmâm, Davud Halîfe b. Mehmed el-Müezzin, zahrü’l-eşbâh Mehmed Ağa b. Ali el-Cündî, fahrü’l-akrân İbrahim Ağa b. Ali el-Cündî, fahrü’l-müderrisîn Ahmed Efendi b. Mahmud, Mehmed Çelebi b. Ali, Ali b. Abdülgaffâr el-Cündî, Mustafa b. Mehmed el-Muhtesib, Ali Beşe b. Mustafa el-Muhzır, Baba Süleyman el-Muhzır ve gayruhüm mine’l-huzzâr