Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 162 Hüküm no: 165 Orijinal metin no: [32a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ebûbekir b. Mehmed’in evini Yusuf b. Abdullah’a sattığı [Derkenâr:] Gurre-i Cumâdelûlâ li sene erba‘a ve hamsîn ve elf. Vilâyet-i Rumeli’nde nefs-i kasaba-i Delvine mahallâtından Ruse mahallesinde sâkin Ebûbekir b. Mehmed meclis-i şer‘-i hatîr-i lâzımü’t-tevkīrde işbu râfi‘ü’l-kitâb Yusuf b. Abdullah mahzarında bi’t-tav‘i’s-sâf ikrâr ve i‘tirâf edip akd-i âtî sudûruna değin silk-i mülk-i sahîh-i sarîhimde münselik olan emlâkimden mahalle-i mezbûrede vâki‘ bir tarafdan Ali b. ( ) menzili ve bir tarafdan Mehmed b. ( ) menzili ve bir tarafdan Hüseyin b. ( ) menzili ve bir tarafdan müşterî-i mezbûr menzili ile mahdûd bir bâb fevkānî beyti ve altında ahırı ve cüneyneyi ve kenîfi müştemil olan mülk menzilimi cemî‘ tevâbi‘ ve levâhıkı ile ve kâffe-i hukūk ve merâfıkı ile mezbûr Yusuf’a üç bin ceyyid cedîd nakd-i fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ettikden sonra semeni olan mezbûrü’n-na‘t üç bin akçeyi yedinden bi’t-tamâm ve’l-kemâl ahz u kabz edip menzil-i mezbûru mahallinde kabza müşterî-i merkūm Yusuf’u taslît eyledim ba‘de’l-yevm menzil-i mezbûr mülk-i müşterâ-yı sahîh [ve] sarîhidir keyfe mâ yeşâ’ ve yürîd bilâ-nizâ‘ min karîb ev ba‘îd mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrârını el-mukarru lehü’l-mezbûr Yusuf bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olunup tâlib-i mezbûr Yusuf yedine vaz‘ ve def‘ olundu. Tahrîren fi’l-yevmi’s-sânî min Cumâdelûlâ li sene 1054. Şuhûdü’l-hâl: Kasım b. ( ), Osman b. ( ), Ahmed b. ( ), Mustafa b. Mehmed, Ali b. Mustafa, Mustafa b. Veli, İbrahim b. Mustafa, Hüseyin b. Ali, Bayram Sofu, Süleyman b. Turgud, Ahmed Beşe Çukadâr ve gayruhüm mine’l-huzzâr