Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 164 Hüküm no: 167 Orijinal metin no: [32b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çoban Panayot v. Yani ile Hamadinos v. Yorgi adlı çobanın koyun alışverişi yaptıkları, bedelin bir kısmının nakid ödendiği, kalanı karşılığında koyun verildiği Çoban tâifesinden Panayot v. Yani meclis-i şer‘-i hatîr-i lâzımü’t-tevkīrde işbu râfi‘ü’l-kitâb Hamadinos v. Yorgi nâm zimmî çoban muvâcehesinde bi’t-tav‘ ve’l-ihtiyâr lâ bi’l-kerh ve’l-icbâr ikrâr ve i‘tirâf edip bundan akdem mezbûr Panayot’dan beher re’s yüz ikişer akçeye olmak hesâbı üzre on beş bin üç yüz akçeye iştirâ ve kabz eylediğim yüz elli re’s koyun bahâsından sekiz bin üç yüz akçesini edâ ve teslîm edip ve yedi bin akçesi mukābelesinde beher re’s yetmiş beşer akçeye olmak hesâbı üzre doksan re’s koyunumu Hamadinos’a yedi bin akçeye bey‘ ve teslîm ve ol dahi iştirâ ve tesellüm eyledikden sonra semen-i mezbûr yedi bin akçeyi zimmetinde lâzım gelen yedi bini takās edip ol dahi ber vech-i muharrer mukāssa eyledi min ba‘d zikr olunan doksan koyun mülk-i müşterâsıdır keyfe mâ yeşâ’ ve yürîd mutasarrıf olsun dedikde mukırr-ı mezbûrun vech-i mübeyyen [üzre] cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olunup tâlibi yedine vaz‘ ve def‘ olundu. Hurrire fi’l-yevmi’s-sânî min Cumâdelûlâ li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali b. Mustafa mine’l-huddâm, Mustafa Beşe b. Veli mine’l-huddâm, İbrahim Çelebi b. Mustafa mine’l-huddâm, Hüseyin Çelebi b. Ali, Bayram Sofu mine’l-huddâm, Süleyman Dede b. Turgud [ve gayruhüm] mine’l-hâzırîn