Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 164 Hüküm no: 168 Orijinal metin no: [32b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe Hâtun bt. Mehmed’in tamir ettirdiği vakıf eve yapılan masrafın tespiti için keşif yapıldığı Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından İdris köşkü kurbunda Zeynep Hâtun mahallesinde sâkin Âişe Hâtun bt. Mehmed tarafından husûs-ı âti’l-beyâna vekîl olup hasm-ı şer‘î-i câhid mahzarında bimâ hüve nehcü’s-sübût şer‘an vekâleti sâbite olan zevci bâ‘isü’l-kitâb Halil b. el-merhûm Derviş Haydar meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip merhûme Benefşe Hâtun vakfı olup mahalle-i mezbûrede vâki‘ süknâsı sulehâdan bir kimesneye meşrût olup bir tarafı Osman b. Osman mülkü ve bir tarafı Zarife Hâtun bt. Murad mülkü ve bir tarafı Fâtıma Hâtun bt. ( ) mülkü ve bir tarafı tarîk-i âm ile mahdûd bir fevkānî ve bir tahtânî beyti ve bi’r-i mâyı ve kenîfi ve zât-ı eşcâr-ı müsmir[e] ve gayr-ı müsmire cüneyneyi hâvî zevcem ve müvekkilem mezbûre Âişe Hâtun’un tasarrufunda olan menzili izn-i mütevellî ve kendi malı ile ta‘mîr eyledi savb-ı şer‘den üzerine varılıp harc ve sarf eylediği meblağın merte[b]e-i tahammülü tahmîn olunmak matlûbumdur dedikde cânib-i şer‘-i kavîmden mevlânâ Hidâyetullah Efendi irsâl olunup ol dahi hâssa mi‘mârlardan Üstâd Mustafa b. Abdülmennân ve zeyl-i kitâbda mastûrü’l-esâmî olup ebniye ve sukūfa vukūfu olan bî-garaz müslimîn ile menzil-i mezbûrun üzerine varıp mi‘mâr-ı mezbûr vakf-ı mezbûra hâlen mütevellî olan Mehmed Çelebi b. Hasan nâm râcil mahzarında mesâha eyledikde fevkānî menzilin tûlen ve arzan bi-hesâb-ı şatrancî otuz üç zirâ‘ taş duvarın beher zirâ‘ına kırkar akçeden bin üç yüz yirmi akçe ve yine tûlen ve arzan bi-hesâb-ı mezbûr yetmiş sekiz zirâ‘ dolma duvarın beher zirâ‘ına yirmişer akçeden bin beş yüz yirmi akçe ve yine tûlen ve arzan bi-hesâb-ı mezbûr otuz zirâ‘ tahta döşemenin beher zirâ‘ına yirmişer akçeden altı yüz akçe ve yine tûlen ve arzan bi-hesâb-ı mezbûr yirmi zirâ‘ sundurmasının kırk üç aded kestane tahtasının beher tânesi altışar akçeden iki yüz elli sekiz akçe ve kapı ve pencere ve dolap ve ocağına maktû‘an yedi yüz akçe ve yine tûlen ve arzan bi-hesâb-ı mezbûr olan iki buçuk zirâ‘ taş duvarın beher zirâ‘ına kırkar akçeden beş yüz akçe ve yine tûlen ve arzan bi-hesâb-ı mezbûr yüz zirâ‘ havlunun taş duvarının beher zirâ‘ına kırkar akçeden dört bin akçe ve kenîf ve gayrı meremmâta maktû‘an altı yüz akçe cem‘an müvekkile-i mezbûre Âişe Hâtun’un ihdâs ettiği ebniyenin on iki bin dört yüz elli sekiz akçeye tahammülü vardır noksan ile olmaz deyû mi‘mâr-ı mezbûr ve sâir müslimîn icmâ‘ ve ittifâk eylediklerinde? mevlânâ-yı mezbûr mahallinde tahrîr ba‘dehû meclis-i şer‘a gelip ihbâr eyledikde mâ vaka‘a bi’t-taleb ketb olundu. Hurrire fî gurreti Cumâdelûlâ li sene 1054. Şuhûdü’l-hâl: Mustafa Halîfe b. Ali el-İmâm, Veli Çelebi b. Mustafa el-Müezzin, eş-Şeyh Şaban b. Yahya, el-Hâc Eyüb b. Süleyman, el-Hâc Hüseyin b. Ali, el-Hâc Hüseyin b. Şaban, Ahmed Çelebi b. Eyüb, Abdülkādir b. Mehmed, Hüseyin b. Ramazan, Mehmed Çelebi b. ( ) er-Râcil ve gayruhüm