Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 165 Hüküm no: 169 Orijinal metin no: [33a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Ebûbekir’in bahçesini Mahmud b. Yunus ile zevcesi Mülâyim bt. Abdullah’a sattığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Zeynep Hâtun mahallesinde sâkin fahrü’l-eşbâh Mustafa Beşe b. Ebûbekir nâm râcil meclis-i şer‘-i hatîr-i lâzımü’t-tevkīrde işbu hâmileyi’l-kitâb Mahmud b. Yunus ve zevcesi Mülâyim Hâtun bt. Abdullah mahzarında bi’t-tav‘ ve’r-rızâ ikrâr ve takrîr-i kelâm edip akd-i âtî sudûruna değin silk-i mülk-i sahîhimde münselik olan emlâkden mahalle-i mezbûrede vâki‘ iki tarafdan benim mülküme ve bir tarafdan İbrahim Beşe b. Hızır mülküne ve bir tarafdan Ali Beşe b. Abdullah mülküne müntehî bi’r-i mâyı ve eşcâr-ı müsmire ve gayr-ı müsmireyi hâvî tûlen ve arzan bi-hesâb-ı şatrancî bin yüz otuz zirâ‘ a[r]sayı müştemil mülk bahçeyi cümle tevâbi‘ ve levâhıkı ve âmme-i menâfi‘ ve merâfıkı ile ale’l-iştirâki’s-seviy merkūmân Mahmud ve Mülâyim Hâtun’a dört bin cedîd ceyyid râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm ve onlar dahi vech-i mübeyyen üzre iştirâ ve tesellüm eyledikden sonra semeni olan meblağ-ı mezbûrü’n-na‘t dört bin akçeyi ale’l-iştirâki’s-seviy merkūmân Mahmud ve Mülâyim Hâtun yedlerinden bi’t-tamâm ve’l-kemâl ahz u kabz eyledim ba‘de’l-yevm zikr olunan bahçe ale’l-iştirâk merkūmân Mahmud ve Mülâyim Hâtun’un mülk-i müşterâ-yı sarîhidir keyfe mâ yeşâ’ ve yahtâr mutasarrıf olsunlar dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-merkūmân Mahmud ve Mülâyim bi’l-muvâcehe tasdîk edicek mâ hüve’l-vâki‘ gıbbe’l-ibtigā sebt ve imlâ ve tahrîr-i inşâ olundu. Hurrire fi’r-râbi‘ min Cumâdelûlâ li sene erba‘a ve hamsîn ve elf. Şuhûdü’l-hâl: Mehmed Çelebi b. Hasan er-Râcil, Ali Çelebi b. Abdülmennân er-Râcil, Mustafa Beşe b. Mehmed el-Muhtesib, İbrahim Çelebi b. Mustafa ve gayruhüm mine’l-huzzâr