Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 166 Hüküm no: 170 Orijinal metin no: [33a-2, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Abdülmennân ve zevcesi Vildan Hâtun bt. Abdullah’ın evlerini merhûm el-Hâc Ahmed el-Habbâz Vakfı’na bey‘ bi’l-istiğlâl yoluyla sattıkları Hasan Bey b. Abdülmennân nâm kimesne meclis-i şer‘-i şerîf ve mahfil-i dîn-i münîfde -Allahü te‘âlâ tağyîr ve tahrîfden korusun- zikr-i âti’z-zikr bey‘ ve istîcârı ikrâra kendisi tarafından asâleten ve zevcesi Vildan Hâtun bt. Abdullah nâm hâtun kıbelinden husûs-ı âti’l-beyâna hasm-ı şer‘î-i câhid mahzarında Mustafa Halîfe b. Halil el-İmâm ve Ali Çelebi b. el-Hâc Ahmed nâm kimesneler şehâdetleriyle vekâleti sâbit olup vekâleten ikrâr ve i‘tirâf eyledi ki müvekkil-i mezbûr medîne-i Kostantıniyyetü’l-mahmiyye’de vâki‘ olan merhûm el-Hâc Ahmed el-Habbâz vakfı’na kāimmakām-ı mütevellî olan hâmil-i hâze’l-kitâb Hüseyin Çelebi b. Ali nâm kimesneye bu akdin sudûruna değin kendisine âid mülkü olup yedinde ve taht-ı tasarrufunda bulunan medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Bıçakçı Ferhad mahallesinde vâki‘ bir tarafdan Şehnâmecizâde deyû bilinen merhûm Mehmed Çelebi veresesi mülkü ve bir tarafdan Âişe Hâtun bt. Ebûbekir mülkü ve Manolaki v. ( ) mülkü ve bir tarafdan tarîk-i âm ile mahdûd olan cemî‘ menzilini bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık kadri ve nisâbı yüz kıt‘a esedî guruş i‘tibâr olunur harbî sikke ile meskûk kıt‘a-i fıddî semen-i mu‘ayyen-i makbûza bey‘ etmeğin ol dahi vakf-ı mezbûr malı ile onlardan istiğlâlen iştirâ eyleyip bey‘ ve iştirâ-i sahîhayn-i şer‘iyyeyn eyledikden sonra menzil-i mezbûru ba‘de’t-tahliyye ve’t-tekābuz işbu kitâbın zeylindeki târihden sene-i kâmile tamâmına değin bu müddet için mikdârı on beş kıt‘a mezbûrü’n-na‘t ücret-i mu‘ayyeneye mütevelli’l-mezbûrdan istîcâr eylemeğin ol dahi ona îcâr ettikde îcâr ve istîcâr-ı sahîhayn-i şer‘iyyeyn ve sarîhayn-i mer‘iyyeyni ikrâr-ı sahîh-i şer‘î ve i‘tirâf-ı sarîh-i mer‘î ile ikrâr ve i‘tirâf eyledikden sonra men lehü’t-tasdîk kıbelinden dahi vicâhen ve şifâhen tasdîk olunmağın [kayd-ı sicil olundu]. Cerâ zâlike ve hurrire fi’l-yevmi’r-râbi‘ min şehri Cumâdelûlâ li sene erba‘a ve hamsîn ve elf. Şuhûdü’l-hâl: Mehmed Çavuş b. ( ) Kethüdâ-i habbâzân, Derviş Çavuş b. Abdullah, el-Hâc Mehmed b. Ebûbekir, Ali Çelebi b. Cafer, Süleyman b. Ebûbekir ..?, Ali Beşe b. Abdullah er-Râcil, el-Hâc Ali b. ( ) el-Habbâz, Dilâver b. Abdullah ve gayruhüm mine’l-huzzâr