Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 170 Hüküm no: 176 Orijinal metin no: [34a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey b. Hasan ile zevcesi Fâtıma Hâtun bt. Mustafa’nın vekilleri vâsıtasıyla boşandıkları Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Takyecibaşı mahallesi sâkinâtından Fâtıma Hâtun tarafından husûs-ı câi’z-zikri ikrâra vekîl olup vekâleti bimâ hüve nehcü’ş-şer‘î Mehmed Çelebi b. Abdurrahman ve Usta Receb b. Ramazan şehâdetleri ile sâbite olan babası Mustafa Bey b. Ahmed mahfil-i kazâda müvekkile-i mezbûrenin zevci olup hâlen kasaba-i Balıkesir’de sâkin işbu râfi‘ü’l-kitâb Hüseyin Bey b. Hasan nâm cündî tarafından müvekkile-i mezbûreyi tatlîke ve ikrâr-ı âti’l-beyânı tasdîke vekîl olup vekâleti hasm-ı şer‘î-i câhid mahzarında Mehmed Bey b. Abdullah ve Selim Bey b. Mustafa nâm kimesneler şehâdetleri ile sâbite olan Cuma b. Ali nâm kimesne muvâcehesinde bi’l-vekâle ikrâr ve takrîr-i kelâm edip kızım müvekilem mezbûre Fâtıma müvekkil-i merkūm Hüseyin Bey’in zevce-i menkûhası olup hâlen mezbûre Fâtıma’yı talâk-ı bâyin ile tatlîke ve mehr-i müecceli edâ ve teslîme mezbûr Cuma’yı tevkîl edip ol dahi vekâlet-i mezbûreyi kabûl eyledikden sonra mezbûre Fâtıma’yı talâk-ı bâyin ile tatlîk eylemeğin ol dahi zevci Hüseyin Bey’in zimmetinde mütekarrir olan on iki bin züyûf akçe mehr-i müeccel-i mukābelesinde vekîl-i mezbûr Cuma yedinden yetmiş beş riyâlî guruş ve nafaka-i iddeti ve me’ûnet-i süknâsı mukābelesinde dahi iki bin akçe kıymetli bir yâkut hâtem ahz u kabz edip zevci mezbûr Hüseyin Bey’in zevciyyete müte‘allik cemî‘ da‘vâ ve nizâ‘dan zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledi dedikde vekîl-i mezbûr Mustafa Bey’in bi’l-vekâle sâdır ve cârî [34b ] olan ikrâr ve takrîrini merkūm Cuma bi’l-muvâcehe tasdîk ve bi’l-müşâfehe tahkīk eylemeğin işbu hurûf bi’t-taleb ketb ü tahrîr olundu. Tahrîren fi’l-yevmi’r-râbi‘ min şehri Rebî‘ilâhir li sene erba‘a ve hamsîn ve elf. Şuhûdü’l-hâl: İshak Çelebi b. Veli el-İmâm, Ali Beşe b. Mehmed el-Hayyât, Abdülkerim b. ( ) el-Bakkāl, Derviş Hasan b. ( ) el-Attâr, Ali Beşe b. Mustafa, Hüseyin Çelebi b. Ali, Musa b. Mehmed ve gayruhüm mine’l-huzzâr