Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 171 Hüküm no: 177 Orijinal metin no: [34b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yamandi v. Atanaş’ın evini yeniçerilerin altmış sekizinci odasının vakıf nukûduna bey‘ bi’l-istiğlâl yoluyla sattığı Kazâ-i Havâss-ı Refî‘a müzâfâtından Küçükçekmece nâhiyesine tâbi‘ Ayastefanos nâm karyede sâkin Kıranoğlu demekle ma‘rûf Yamandi v. Atanaş nâm zimmî meclis-i şer‘-i hatîr-i lâzımü’t-tevkīrde Dergâh-ı âlî -dâme mahfûfen bi’l-me‘âlî- yeniçerileri zümresinden turnacılar demekle şehîr altmış sekizinci cemâ‘atinin odalarına vakıf olan nukūda bi’l-fi‘l mütevellî olan işbu hâmil-i hâze’l-kitâb fahrü’l-akrân Ali Çelebi b. Ömer nâm râcil mahzarında bi-tav‘ihî ikrâr ve takrîr-i kelâm edip karye-i mezbûrede vâki‘ kendi silk-i mülkümde münselik ve münharit olup lede’l-ahâlî ma‘lûmü’l-hudûd mülk menzilimi cümle tevâbi‘ ve levâhıkı ve âmme-i menâfi‘ ve merâfıkı ile bundan akdem mâl-ı vakf-ı mezbûr ile mütevellî-i mûmâ-ileyh Ali Çelebi’ye yirmi bin akçe olmak hesâbı üzre iki yüz elli riyâlî guruşa bi-tarîki’l-istiğlâl bey‘ edip semen-i mersûm yirmi bin akçeyi mütevellî-i mezbûr yedinden bi’t-tamâm ve’l-kemâl ahz u kabz edip teslîm-i mebî‘ eyledikden sonra menzil-i mezkûru ba‘de’t-tahliyyeti’ş-şer‘iyye ve’t-tekābuz mütevellî-i mezbûr işbu târih-i kitâb senesinde vâki‘ Saferü’l-hayr gurresinden yedi ay tamâmına değin iki bin akçeye bana îcâr ve ben dahi vech-i mübeyyen üzre istîcâr ve kabûl eyledim dedikde mukırr-ı mezbûrun minvâl-i muharrer üzre cârî ve sâdır olan ikrâr ve takrîrini el-mukarru lehü’l-merkūm mütevellî Ali Çelebi bi’l-muvâcehe tasdîk ettikden sonra bâyi‘-i mezbûr Yamandi işbu hâzır bi’l-meclis olan Mustafa Beşe b. Hüsrev nâm râcili ecel-i mev‘ûd tamâmında menzil-i mezkûru semeni misli ile bey‘ ve semenini kabza ve deyn-i mersûmu mütevellî-i merkūma edâ ve îfâya ve ziyâdesini kendiye îsâle ve kabz-ı îsâl mütevakkıf olur umûrun küllîsine azl ve in‘izâlden masûn vekâlet-i devriyye ile Mustafa Beşe’yi vekîl ve kendi menâbıma nâib nasb ve ta‘yîn eyledim dedikde ol dahi vekâlet-i mezbûreyi kabûl ve hizmet-i lâzımesini edâya müte‘ahhid olmağın mâ vaka‘a gıbbe’l-ibtigā sebt olundu. Tahrîren fi’l-yevmi’s-sânî aşer min şehri Rebî‘ilâhir li sene erba‘a ve hamsîn ve elf. Şuhûdü’l-hâl: Süleyman Beşe b. Ali er-Râcil, Yusuf Beşe b. Abdullah, Davud Beşe b. Ebûbekir er-Râcil, el-Hâc İbrahim Bey el-Bevvâbü’s-sultânî, el-Hâc Ali b. ( ) neccâr, Rıdvan b. Abdullah, Kara Mustafa Beşe, Receb Beşe ve gayruhüm mine’l-huzzâr