Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 172 Hüküm no: 178 Orijinal metin no: [34b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola ve Yani’nin derede boğularak ölen Karaca v. Petko için Petko ve Vaso hakkında açtıkları davadan vazgeçtikleri Vilâyet-i Rumeli’nde Kalkandelen kazâsına tâbi‘ Platin nâm karye sâkinlerinden Nikola v. Petko ve Yani v. Dastapano nâm zimmîler meclis-i şer‘-i hatîr-i lâzımü’t-tevkīrde işbu hâmileyi’l-kitâb Petko ve Vaso veledey Apostol nâm zimmîler muvâcehesinde her biri ikrâr ve takrîr-i kelâm edip li ebeveyn karındaşımız olup târih-i kitâbdan iki sene mukaddem kasaba-i Çorlu kurbunda Yulaflı nâm karye civârında vâki‘ derede suya boğulup mürd olan Karaca v. Petko nâm zimmînin helâkine müte‘allik merkūmân Petko ve Vaso ile bir kapıya hizmet edip ve ayş-i işretleri dahi bir yerde olmağla mezbûrândan sû-i zan üzre idik, el-hâletü hâzihî vâki‘ hâl karye-i mezbûre ahâlîsinden olan kimesnelerden istihbâr olundukda fi’l-hakīka mürd-i mezkûr Karaca târih-i kitâbdan iki sene mukaddem mârrü’z-zikr karye kurbunda vâki‘ derede suya boğulup helâk olduğu aslı ile ma‘lûmumuz olmağın ettiğimiz da‘vâdan fâriğ olup husûs-ı mezbûra müte‘allik da‘vâ ve talebden mezkûrân Petko ve Vaso’nun zimmetlerini ibrâ-i âm ile ibrâ ve iskāt-ı tâm eyledik min ba‘d da‘vâ ve nizâ‘ımız yokdur dedikde mukırrân-ı merkūmânın minvâl-i muharrer üzre cârî ve sâdır olan ikrâr ve takrîrlerini el-mukarru lehüma’l-mezbûrân Petko ve Vaso bi’l-muvâcehe tasdîk edicek mâ hüve’l-vâki‘ gıbbe’t-taleb ketb olundu. Tahrîren fi’l-yevmi’r-râbi‘ min Cumâdelûlâ li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali Beşe b. Mustafa el-Muhzır, Musa b. Mehmed, Hüseyin Çelebi b. Ali, Kostantin [v.] Yorgaki, Anastas v. Nikola, Lambo v. Yani, Yorgi v. Mando, Yamandi v. Yani, Kolak? Kethüdâ, Kozma ve gayruhüm