Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 176 Hüküm no: 184 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. El-Hâc Sübhanverdi b. Ahmed’in çömlekçi dükkânında ortağı ve kiracısı olan Kosta v. Yani ile muhtelif alacak verecek ve kira hakkındaki davadan sulh oldukları Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Takyecibaşı mahallesi sâkinlerinden zahrü’l-eşbâh el-Hâc Sübhanverdi b. Ahmed nâm kimesne meclis-i şer‘-i hatîr-i lâzımü’t-tevkīrde müste’ciri olan işbu hâmil-i hâze’l-kitâb Kosta v. Yani nâm zimmî muvâcehesinde bi-tav‘ihî ikrâr-ı tâm ve takrîr-i kelâm edip medîne-i mezbûrede Çömlekçiler sûkunda vâki‘ mülk çömlekçi dükkânımda merkūm Kosta târih-i kitâbdan yirmi beş sene mukaddem müste’cirim ve san‘at-ı mezkûrede şerîkim olmağla mezbûr Kosta’ya yedi bin akçe sermâye ve târih-i kitâba gelince dükkân-ı mesfûrdan hâsıl olan nemâ ve kirâdan mersûm Kosta ile beynimizde nice ahz ve mu‘âmelât ve mu‘âvezât olmağın beynimizde münâza‘ât-ı kesîre ve muhâsamât-ı şedîde vâkı‘a olmuşdu el-hâletü hâzihî beynimizde muslihûn ve müslimûn tavassut edip es-sulhu seyyidü’l-ahkâm fehvâsınca amelen on sekiz bin akçe üzerine beni inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûrü’n-na‘t on sekiz bin cedîd ve ceyyid râyic fi’l-vakt akçeyi mezkûr Kosta yedinden tamâmen ahz u kabz edip husûs-ı mezbûra müte‘allik da‘vâ ve talebden mezbûr Kosta’nın zimmetini ibrâ-i âm ile ibrâ ve iskāt-ı tâm [ile] iskāt eyledim ba‘de’l-yevm husûs-ı mezbûra müte‘allik benden bi’z-zât veya bi’l-vâsıta da‘vâ ve nizâ‘ sudûr ederse lede’l-hükkâmi’l-kirâm mesmû‘a ve makbûle olmaya dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Kosta bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ve imlâ olundu. Hurrire fi’l-yevmi’s-sâdis min Cumâdelûlâ li sene erba‘a ve hamsîn ve elf. Şuhûdü’l-hâl: Usta Ramazan b. Derviş, Üstâd Ahmed b. Mehmed, Mehmed Beşe b. Mustafa, Mustafa Beşe b. Mahmud, Yusuf b. Abdullah, İbrahim Çelebi mine’l-huddâm, Mustafa Çelebi mine’l-huddâm ve gayruhüm mine’l-huzzâr