Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 177 Hüküm no: 185 Orijinal metin no: [35b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Manol’ün babasından intikal eden mülk bağını Dimo v. Nikola’ya sattığı Vilâyet-i Rumeli’nde Çirmen sancağında ( ) kazâsında tâbi‘ Büyük Kozluca nâm karyede sâkin Todori v. Manol nâm zimmî meclis-i şer‘-i şerîf-i lâzımü’t-tevkīrde işbu râfi‘ü’l-kitâb Dimo v. Nikola nâm zimmî muvâcehesinde bi’t-tav‘i’s-sâf ikrâr ve i‘tirâf ve takrîr-i kelâm edip karye-i mezbûre kürûmu ve hudûdu dâhilinde vâki‘ bir tarafdan Nikola nâm zimmî bağına ve bir tarafdan Kirko v. Perasko nâm zimmî bağına ve bir tarafdan dereye ve bir tarafdan tarîk-i âm ve ba‘zan Dereka nâm zimmî bağına müntehî tahmînen bir dönüm i‘tibâr olunur bir kıt‘a, babam mezbûr Manol’den intikāl eden ve mülk-i mevrûsum olan bağımı cemî‘ tevâbi‘i ve levâhıkı ve kâffe-i menâfi‘ ve merâfıkı ile mezbûr Dimo’ya bin dört yüz cedîd ve ceyyid fıddî-i Osmânî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i muharrer üzre iştirâ ve tesellüm ettikden sonra semeni olan meblağ-ı mezbûr bin dört yüz akçeyi mezbûr Dimo yedinden bi’t-tamâm ve’l-kemâl ahz u kabz edip mesbûkü’z-zikr bir kıt‘a bağı müşterî-i mezbûr Dimo’yu mahallinde kabza taslît eyledim ba‘de’l-yevm zikr olunan bağ cemî‘ tevâbi‘ ve levâhıkı ile mezbûr Dimo’nun mülk-i müşterâ-yı sahîh [36a ] ve sarîhidir keyfe mâ yeşâ’ ve yahtâr mutasarrıf olsun dedikde mukırr-ı mezbûrun ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr bi’l-muvâcehe tasdîk ve bi’l-müşâfehe tahkīk edicek mâ vaka‘a bi’t-taleb ketb olunup tâlibi yedine vaz‘ olundu. Tahrîren fi’l-yevmi’s-sâbi‘ min Cumâdelûlâ li sene erba‘a ve hamsîn ve elf. Şuhûdü’l-hâl: Yani v. Mişo, Dimo v. Minho, Kirko v. Hristo, Dereka v. Prasko, Kino v. Dimo, Prasko v. Mihal ve gayruhüm mine’l-hâzırîn