Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 178 Hüküm no: 187 Orijinal metin no: [36a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ahmed’in mülk arsasını Oruç Bey b. Ali’ye sattığı Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Otakçıbaşı mahallesinde sâkine fahrü’l-muhadderât Fâtıma bt. Ahmed nâm hâtun tarafından bey‘-i âti’z-zikri ikrâra vekîl olup hasm-ı câhid-i şer‘î mahzarında mezbûreyi ma‘rifet-i şer‘iyye ile ârifân olan Hasan Halîfe b. Ali el-Müezzin ve Mustafa Bey b. ( ) el-Cündî şehâdetleri ile vekâleti sâbite olan müvekkile-i mezbûrenin zevci fahrü’l-akrân Dilâver Bey b. Abdülmennân nâm cündî meclis-i şer‘-i şerîf-i lâzımü’t-tevkīrde işbu râfi‘ü’l-kitâb fahrü’l-eşbâh Oruc Bey b. Ali nâm cündî mahzarında bi’l-vekâle ikrâr ve takrîr-i kelâm edip müvekkilem mezbûrenin ilâ hîni sudûri hâze’l-akd mülk-i mevrûsu olup mahalle-i mezbûrede vâki‘ bir tarafdan Mehmed Çelebi b. Hasan mülkü ve bir tarafdan mestçi Mehmed mülkü ve bir tarafdan mahalle-i mezbûre mescidi müezzinine meşrût vakıf menzil ve bir tarafdan tarîk-i âm ile mahdûd bir su kuyusunu hâviye mülk arsa-i hâliyesini cemî‘ tevâbi‘ ve levâhıkı ile merkūm Oruc Bey’e dört bin yedi yüz ceyyid cedîd râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve tesl[î]m ve ol dahi vech-i muharrer üzre iştirâ ve tesellüm ettikden sonra semeni olan meblağ-ı mezbûr dört bin yedi yüz akçeyi merkūm Oruc Bey yedinden bi’t-tamâm ve’l-kemâl ahz u kabz edip ba‘de’l-yevm zikri sebk eden arsa-i hâliye müşterî-i merkūm Oruc Bey’in mülk-i müşterâ-yı sahîh ve sarîhidir keyfe mâ yeşâ’ mutasarrıf olsun dedikde mukırr-ı mezbûrun bi’l-vekâle ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûr Oruc Bey bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâmin min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-eimme Sefer Efendi el-İmâm, el-Hâc İbrahim b. Mehmed, Ahmed Çelebi b. Hasan, el-Hâc Hüseyin Bey b. Yusuf el-Cündî, Ali Çelebi b. İlyas, Mehmed Beşe b. Nasuh er-Râcil, Ahmed Beşe er-Râcil Çukadâr, İbrahim Çelebi b. Mustafa min huddâm, Fahrü’l-akrân Mustafa Bey b. ( ) el-Cündî, Fahrü’l-akrân Süleyman Bey b. ( ) el-Cündî, Hüseyin Beşe b. Ali