Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 179 Hüküm no: 188 Orijinal metin no: [36a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Marola bt. Kosta’ya ait olan menzil, bağ ve tarlayı kocasından satın aldığı iddiasıyla fuzûlî olarak kullanan Panayot v. Yani’nin men edilmesine dâir Kazâ-i Havâss-ı sultâniyye müzâfâtından Büyükçekmece nâhiyesine tâbi‘ Bigados nâm karyede sâkine bâ‘isetü’l-kitâb Marola bt. Kosta nâm Nasrâniyye meclis-i şer‘-i hatîr-i lâzımü’t-tevkīrde yine karye-i mezbûre zimmîlerinden olup zikr-i âtî menzil ve bağ ve tarlaya vâzı‘ü’l-yed ettiği şer‘an sâbit olan Panayot v. Yani nâm zimmî muvâcehesinde üzerine da‘vâ ve takrîr-i kelâm edip târih-i kitâbdan bir sene mukaddem zevcim olup gāib ani’l-meclis olan Yani v. Mihal nâm zimmî beni mahmiye-i İstanbul’a [36b ] getirdikde karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir bâb tahtânî mülk menzilimi beş bin akçeye üç dönüm bağı dahi bin akçeye ve iki kıt‘a tarlanın hakk-ı tasarrufunu üç bin beş yüz akçeye ki cem‘an dokuz bin beş yüz cedîd ve ceyyid akçeye zevcim mezbûr Yani’den iştirâ eyledim deyû mezbûr Panayot fuzûlî vaz‘-ı yed etmekle mahmiye-i mezbûrede Ahî Çelebi mahkemesinde hilâfete müvellâ olan Hüseyin Efendi b. Abdülhalim huzûrunda mürâfa‘a olduğumuzda mârrü’z-zikr menzil ve bağ ve tarladan kasr-ı yedine tenbîh ve bin elli dört senesi şehri Rebî‘ulevveli’nin on beşinci günü ile müverrah yedine hat ve hatmini müştemil hüccet-i şer‘iyye verilmişken hâlen dahi tasarrufuma mâni‘ olur suâl olunup kasr-ı yedine tenbîh olunmak matlûbumdur dedikde gıbbe’s-suâl merkūm Panayot cevâbında fi’l-hakīka mezbûre Marola müşârün-ileyh Efendi huzûrunda mürâfa‘a olup kasr-ı yedine tenbîh mârrü’z-zikr bağ ve tarla ve menzil merkūmenin mülkü olduğunu bi’l-müşâfehe mukır ve mu‘terif olmağın ber mûceb-i ikrârihî zikri mürûr eden tarla ve bağ ve menzilden kasr-ı yedine tenbîh birle mâ hüve’l-vâki‘ gıbbe’l-ibtigā ketb ve imlâ olundu. Tahrîren fi’l-yevmi’s-sâmin min Cumâdelûlâ li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed el-Muhtesib, Ali Beşe b. Mustafa, Baba Süleyman b. Turgud, Hüseyin Çelebi b. Ali ve gayruhüm mine’l-huzzâr