Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 180 Hüküm no: 189 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Hacı Ömer’in miras yoluyla kendisine ve annesi Belkıs Hâtun’a intikal eden evi Haydar Kethüdâ b. Hasan’ın evi ile takas ettiği (mukâyaza usulüyle sattıkları) Medîne-i Ebâ Eyyûb-i Ensârî -radiye anhu Rabbühü’l-Bârî- mahallâtından Kasımpaşa mahallesi[nde] sâkin iken bundan akdem fevt olan merhûm el-Hâc Ömer’in verâseti zevce-i metrûkesi Belkıs bt. Abdullah nâm hâtuna ve sulbî kebîr oğlu Mehmed’e ve sulbiye-i kebîre kızı Ümmühâni’ye münhasıra olduğu şer‘an mütehakkik ve zâhir olup kable’l-kısmet mezbûre Ümmühâni dahi fevt oldukda vâlidesi mezbûre Belkıs ve karındaşı merkūm Mehmed’i terk ettiği bâhir oldukdan sonra merkūme Belkıs Hâtun tarafından husûs-ı âti’l-beyânı ( ) vekîl olup hasm-ı şer‘î-i câhid mahzarında Hüseyin Beşe b. Osman ve Osman b. Abdülmennân şehâdetleriyle şer‘an vekâleti sâbite sadrî oğlu mersûm Mehmed meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızı zahrü’l-eşbâh Haydar Kethüdâ b. Hasan mahzarında asâleten ve vekâleten ikrâr ve takrîr-i kelâm edip babam müteveffâ-yı mezbûrdan irs-i şer‘î ile bize intikāl eden emlâkden mahalle-i mezbûrede vâki‘ bir tarafdan merhûm el-Hâc Mehmed vakfı olan odaları ve bir tarafdan el-Hâc Mustafa b. Abdullah mülküne ve bir tarafdan Taşçızâde Mehmed Bey mülküne ve bir tarafdan tarîk-i âma müntehî bir bâb fevkānî ve iki bâb tahtânî beyti ve ahırı ve bi’r-i mâyı ve kenîfi ve zât-ı eşcâr-ı müsmire ve gayr-ı müsmire bahçeyi müştemil mülk-i mevrûsumuz olan menzil yirmi dört sehim i‘tibâr olunup sihâmı mezkûreden üç sehmi mezbûre Belkıs’a ve yedi sehmi merkūme Ümmühâni’ye ve on dört sehmi mezbûr Mehmed’e intikāl ve mezbûre Ümmühâni dahi fevt oldukda menzil-i mezkûrdan hissesine isâbet eden yedi sehimden iki sehmi ve sülüs sehim vâlidesi mersûme Belkıs’a ve dört sehmi ve sülüsân sehmi karındaşı mezbûr Mehmed’e isâbet eylemeğin menzil-i mahdûd-ı mezkûru cümle tevâbi‘ ve levâhıkı ve kâffe-i menâfi‘ ve merâfıkı ile bi-tarîki’l-mukāyazati’ş-şer‘iyye mûmâ-ileyh Haydar Kethüdâ’nın yine mahalle-i mezbûrede vâki‘ bir tarafı Arpacı Mescidi demekle ma‘rûf mescid duvarı ve bir tarafı Taşçızâde merkūm Mehmed Bey mülkü ve bir tarafı el-Hâc Mustafa b. Abdullah mülkü ve bir tarafı tarîk-i âm ile mahdûd iki bâb fevkānî beyti ve ahırı ve üç bâb dükkânı müştemil olup arsasının beher yevm merhûm Nişancı Paşa vakfı’na iki akçe ücret-i müeccelesi olan mülk menzili ile üç yüz on kıt‘a riyâlî guruşa bey‘ edip her birimiz kabz-ı müşterâ ve teslîm-i mebî‘ eyledik, ba‘de’l-yevm mahalle-i merkūmede vâki‘ hudûd-ı mezkûr ile mahdûd olup mezkûr Haydar Kethüdâ’nın mülkü olan menzil benim mülküm olup ve yine mahalle-i mezbûrede vâki‘ hudûd-ı sâlifü’l-beyân ile mahdûd olup benim mülküm olan menzil mûmâ-ileyh Haydar Kethüdâ’nın mülküdür keyfe mâ yeşâ’ ve yahtâr mutasarrıf olsun dedikde mukırr-ı mezbûrun vech-i mübeyyen üzre cârî ve sâdır olan ikrâr ve takrîrini el-mukarru lehü’l-mezbûr Haydar Kethüdâ bi’l-muvâcehe tasdîk edicek mâ hüve’l-vâki‘ bi’t-taleb ketb olundu. Hurrire fi’l-yevmi’s-sâbi‘ min Cumâdelûlâ li sene erba‘a ve hamsîn ve elf. Şuhûdü’l-hâl: Zahrü’l-akrân Ahmed Ağa b. Ali el-Cündî, Fahrü’l-emsâl Süleyman Ağa b. Abdülmennân, Abdurrahman Çelebi b. Habib el-Hammâmî, el-Hâc Davud Halîfe b. Mehmed el-Müezzin, Abdülkerim Çelebi b. Mansur, Mahmud Beşe b. Veli, Osman Çelebi b. Ebûbekir, Ali Beşe b. ( ) ed-Der‘î?, Ramazan Beşe b. ( ) el-Hayyât, muharriru’l-hurûf Hidâyetullah Efendi el-Kadı ve gayruhüm mine’l-huzzâr