Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 181 Hüküm no: 190 Orijinal metin no: [37a-1, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. Hüseyin’in evini Rahime Hâtun bt. Mustafa’ya sattığı Medîne-i Ebâ Eyyûb el-Ensârî -radiye anhu Rabbühü’l-Bârî- mahallâtından Ahmed Dede mahallesinde sâkin Ahmed b. Hüseyin nâm kimesne -tağyîr ve tahrîfden korunmuş olan- meclis-i [şer‘-i] şerîf ve mahfil-i dîn-i münîfde ikrâr ve i‘tirâf edip bu akdin sudûruna değin mülkünde ve yedinde ve taht-ı tasarrufunda olup mahalle-i mezbûrede [vâki‘] bir tarafdan Hallâc Mehmed b. Abdurrahman mülkü ve bir tarafdan Rahime Hâtun bt. Güllâbî mülkü ve bir tarafdan Hüseyin b. Ali mülkü ve bir tarafdan tarîk-i âm ile mahdûd beyt-i süflîyi ve su kuyusunu ve kenîfi ve zât-ı eşcâr-ı müsmire ve gayr-ı müsmire muhavvatayı muhtevî cemî‘ menzili cümle tevâbi‘ ve levâhıkı ve kâffe-i menâfi‘ ve merâfıkı ile kadri ve nisâbı sekiz bin dirhem fıddî cedîd ceyyid râyic fi’l-vakt semen-i mu‘ayyen-i makbûza hâmilet-i hâze’l-kitâb fahrü’l-muvakkarât Rahime Hâtun bt. Mustafa’ya bey‘ ettikde ol dahi kendi malı ile nefsi için iştirâ eylemeğin tarafeynden îcâb ve kabûlü ve cânibeynden bedeleynde teslîm ve tesellümü müştemil bey‘ ve iştirâ-i bâtteyn-i sahîhayn-i şer‘iyyeyn olmağın ikrâr-ı sahîh-i şer‘î ve i‘tirâf-ı sarîh-i mer‘î eyledikde müşteriye-i mezbûre kıbelinden dahi vicâhen ve şifâhen tasdîk olunmağın [kayd olundu]. Cerâ zâlike ve hurrire fi’l-yevmi’s-sâbi‘ min Cumâdelûlâ li sene 1054. Şuhûdü’l-hâl: Mehmed Beşe b. Ömer er-Râcil, Bâli Beşe b. Sefer er-Râcil, Ahmed Çelebi b. Mehmed, Mehmed Çelebi b. Mustafa, fahrü’l-kuzât Hidâyetullah Efendi el-Kâtib, İbrahim Efendi b. Mustafa el-Kâtib, Himmet Efendi b. Veli el-Kâtib, Hüseyin Çelebi b. Ali mine’l-huddâm, Bayram Sofu mine’l-huddâm ve gayruhüm mine’l-huzzâr