Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 182 Hüküm no: 191 Orijinal metin no: [37a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ahmed Ağa’nın mutasarrıf olduğu vakıf yoğurtçu dükkânı harap durumda olup yeniden yapımı için izin verilmesi ve keşif yapılmasına dâir Mahmiye-i Kostantıniyye mahallâtından Lütf[i] Paşa mahallesi sâkinlerinden işbu kitâb-ı sıhhat-nisâbın sâhibi fahrü’l-a‘yân Mehmed Çelebi b. Ahmed Ağa meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda vakf-ı âti’l-beyânın kāimmakām-ı mütevellîsi olan Fazlullah Efendi b. Mustafa nâm kimesne mahzarında takrîr-i kelâm ve bast-ı mukaddemât-ı merâm edip merhûm İbrahim Paşa-yı atîk evkāfı’ndan olup medîne-i Ebâ Eyyûb-i Ensârî -radiye anhu Rabbühü’l-Bârî- esvâkından Câmi‘-i Kebîr sûkunda vâki‘ etrâf-ı selâsesi vakf-ı mezbûr ve bir tarafı tarîk-i âm ile mahdûd olup icâre-i mu‘accele ve beher şehr elli beşer akçe icâre-i müeccele ile mutasarrıf olduğum bir bâb yoğurtçu dükkânı harâba müşrif olmuşdur, kıbel-i şer‘den üzerine varılıp keşf ve mu‘âyene ve nukzu tahmîn-i sahîh ile tahmîn ve takvîm olunup müceddeden kendi malım ile binâya izin verilmek matlûbumdur dedikde cânib-i şer‘-i kavîmden mevlânâ el-Hâc Ali Efendi irsâl olunup ol dahi hâssa mi‘mârlarından Üstâd Mustafa b. Abdullah ve zeyl-i kitâbda mastûrü’l-esâmî olan müslimîn ile dükkân-ı sâlifü’z-zikrin üzerine varıp mesâha ettiklerinde dükkân-ı mezbûrun bennâ zirâ‘ıyla tûlen on iki buçuk ve arzan sekiz bi-hesâb-ı şatrancî yüz zirâ‘ sakfının beher zirâ‘ı otuzar akçeden üç bin akçe ve yine tûlen yirmi bir ve kadden altı bi-hesâb-ı mezbûr yüz yirmi altı zirâ‘ tahta perdenin beher zirâ‘ı yirmi beşer akçe[den] iki bin beş yüz yirmi akçe ve yine tûlen on sekiz ve arzan dört bi-hesâb-ı mezbûr yetmiş iki zirâ‘ döşeme tahtanın beher zirâ‘ı on beşer akçeden bin seksen akçe ve yine tûlen ve arzan bi-hesâb-ı mezbûr on zirâ‘ tahta sofanın beher zirâ‘ı on beşer akçeden yüz elli akçe ve yine dükkân-ı mârrü’z-zikr önünde destgâhların maktû‘an semeni beş yüz akçeden cem‘an dükkân-ı sâlifü’z-zikrin nukzu yedi bin iki yüz elli akçeye takvîm ve tahmîn eylediklerinde mevlânâ-yı mezbûr mahallinde ketb ü tahrîr ve ba‘dehû gelip meclis-i şer‘-i şerîfde vukū‘u üzre ihbâr ve takrîr eylemeğin kendi malı ile nefsi için binâya izin birle mâ hüve’l-vâki‘ alâ vukū‘ihî bi’t-taleb ketb ve terkīm olunup tâlibi yedine vaz‘ ve def‘ olundu. Tahrîren fi’l-yevmi’l-hâmis min Cumâdelûlâ li sene erba‘a ve hamsîn ve elf. Şuhûdü’l-hâl: Zübdetü’t-tahrîr Mehmed Çelebi b. Mustafa Kâtib-i Zal Paşa, Fahrü’l-akrân Ahmed Bey b. Osman el-Cündî, Mehmed Beşe b. Bâli er-Râcil, Mehmed Beşe b. Abdullah el-Bevvâb-ı sultânî, Mehmed b. Abdullah, el-Hâc Ahmed Beşe Çukadâr, Mustafa Beşe el-Muhtesib, Hüseyin Çelebi b. Ali mine’l-huddâm, Hasan b. Abdullah et-Tatarî, diğer Hasan b. Abdullah, Baba Süleyman b. Turgud ve gayruhüm mine’l-hâzırîn