Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 183 Hüküm no: 192 Orijinal metin no: [37a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Çelebi’nin kızları Ümmühâni Hâtun ile Nesli Hâtun’un babalarından intikal eden menzili Mehmed Bey b. Musa’ya sattıkları Mahmiye-i Kostantıniyye -humiyet ani’l-âfât ve’l-beliyye- mahallâtından Macuncu kurbunda Koruk mahallesinde sâkin zübdeteyi’l-muhadderât Ümmühâni ve Nesli Hâtun ibnetey Hasan Çelebi taraflarından bey‘-i âti’z-zikri ikrâra vekîl olup hasm-ı şer‘î-i câhid mahzarında mezbûretânı ma‘rifet-i şer‘iyye ile ârifân olan el-Hâc Mehmed b. Abdullah el-Hayyât ve Yusuf b. Abdullah nâm eskici şehâdetleriyle vekâleti sâbite olan mezbûre Ümmühâni’nin zevci fahrü’l-akrân Hüseyin Bey b. Sinan meclis-i şer‘-i şerîf-i lâzımü’t-tevkīr ve’t-teşrîfde işbu râfi‘ü’l-kitâb [37b ] fahrü’l-emsâl Mehmed Bey b. Musa nâm cündî muvâcehesinde bi’l-vekâle ikrâr ve takrîr-i kelâm edip Havâss-ı Aliyye müzâfâtından Çatalca nâhiyesine tâbi‘ Marmaracık nâm karyede vâki‘ bir tarafdan Şehsuvar oğlu Ali nâm kimesne mülkü ve etrâf-ı selâsesi tarîk-i âm ile mahdûd olup bir bâb çatma yer evini ve önünde sundurmayı ve zât-ı eşcâr-ı müsmire ve gayr-ı müsmire bahçeyi ve kenîfi ve [hav]luyu müştemil olup babalarından irs-i şer‘î ile kendilere intikāl ve isâbet eden menzili bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık bi-safkatin vâhidetin mezbûr Mehmed Bey’e altı bin nakid cedîd ve ceyyid râyic fi’l-vakt fıddî akçeye bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve tesellüm eyledikden sonra semen-i mezbûr altı bin akçeyi yedinden bi’t-tamâm ve’l-kemâl ahz u kabz eylediklerinden sonra menzil-i mârrü’z-zikri mahallinde ahz u kabza merkūm Mehmed Bey’i taslît eylediler, min ba‘d menzil-i mahdûd mersûm Mehmed Bey’in mülk-i müşterâ-yı sahîh ve sarîhidir keyfe mâ yeşâ’ ve hasbe mâ yürîd bilâ-nizâ‘ min karîb ev ba‘îd mutasarrıf olsun dedikde mukırr-ı mezbûrun bi’l-vekâle cârî ve sâdır olan ikrâr ve takrîrini el-mukarru lehü’l-mezbûr Mehmed Bey bi’l-vicâhe tasdîk ve bi’ş-şifâhe tahkīk eylemeğin mâ vaka‘a bi’t-taleb ketb ve terkīm olundu. Tahrîren fi’l-yevmi’l-âşir min Cumâdelûlâ li sene erba‘a ve hamsîn ve elf. Şuhûdü’l-hâl: El-Hâc Ali b. İbrahim, Hızır Çelebi b. Ali, Fahrü’l-akrân Ali Çelebi b. Hüseyin Bey, Şaban Bey el-Cündî, Hacı Mehmed ve gayruhüm