Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 184 Hüküm no: 193 Orijinal metin no: [37b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Meleksima Hâtun’un ölümünden sonraki işler için Mehmed Efendi’yi vasî tayin ettiği Husûs-ı âti’l-beyânın mahallinde tahrîri iltimâs olunmağın savb-ı şer‘den mevlânâ İbrahim Efendi irsâl olunup ol dahi zeyl-i kitâbda mastûrü’l-esâmî olan kimesneler ile medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Takyecibaşı mahallesinde vâki‘ fahrü’l-müderrisîni’l-kirâm zahrü’l-müdekkıkīn el-fihâm Mehmed Efendi b. Mustafa eş-şehîr bi-Tekrîmî Çelebi menziline varıp akd-i meclis eylediklerinde menzil-i mezbûr sâkinelerinden Meleksîmâ Hâtun bt. Abdullah meclis-i mezbûrda işbu râfi‘ü’l-kitâb merkūm Mehmed Efendi mahzarında ikrâr ve takrîr-i kelâm edip merkūm Mehmed Efendi’nin menzilinde olduğum ecilden silk-i mülk-i sahîh ve sarîhimde münselik bir köhne topsuz kırmızı kadife kaftan ve bir kırmızı köhne kemha zıbın ve bir alaca çarşaf ve bir beyaz çarşaf ve bir yirmi dört yaftalı sîm kuşak ve bir köhne silecek ve bir mâ’î köhne göndere ferâce ve altı yemeni yastık ve bir beledî döşek ve iki minder kılıfı ve üç köhne yemeni yorgan ve bir beyaz müsta‘mel velense ve bir sagīr tâbe ve iki sagīr tencere ve iki ayaklı sahan ve iki bakır tepsi ve iki bakır tas ve bir köhne kırmızı kilim ve bir kahverenk Londra çukaya kaplı siyah köhne kuzu kürkü ve altı arşın üstübü ipliği olup eşyâ-i mezbûreden gayrı ism-i mâl ıtlâk olunur bir şeyim ve bir habbem dahi yokdur deyip ve mezbûr Mehmed Efendi’yi vasiyy-i muhtâr nasb ve ihtiyâr ve nâib-i menâb eyledim ki bi-emrillâhi’l-meliki’l-müte‘âl vefât eylediğimde zikr olunan emvâlimden bir sîm kuşağımı ve bir kadife kaftanımı ve mâ’î göndere ferâcemi semen-i misli ile bey‘ edip techîz ve tekfînimin ve sâir eyyâmı mu‘tâdemin mühimmâtına sarf ve harc eylesin dedikde mûmâ-ileyh Mehmed Efendi dahi vesâyet-i merkūmeyi kabûl ve hizmet-i lâzımesini edâya müte‘ahhid olmağın işbu hurûf bi’t-taleb ketb ve terkīm olundu. Hurrire fi’l-yevmi’t-tâsi‘ min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-kuzât Receb Efendi b. Abdülcelîl, Fahrü’l-eimme İshak Efendi b. Veli el-İmâm, Ahmed Çelebi b. Hasan el-Müezzin, Yusuf Bey b. Abdullah, Mustafa Bey b. Ali, Uzun Mehmed Çelebi b. Abdurrahman, İbrahim Çelebi b. Mustafa ve gayruhüm mine’l-huzzâr