Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 184 Hüküm no: 194 Orijinal metin no: [37b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cafer b. Aydın’ın vârislerinden kız kardeşi Fâtıma’nın miras hissesi karşılığında beş bin beş yüz akçe alarak sulh olduğu Medîne-i Ebâ Eyyûb-i Ensârî -radiye anhu Rabbihi’l-Bârî-de Otakçıbaşı mahallesinde sâkin iken bundan akdem vefât eden Cafer b. Aydın nâm sagīrin verâseti vâlidesi Fâtıma bt. Ahmed’e ve li eb kız karındaşı Fâtıma ile li eb er karındaşı Mehmed ve kız karındaşı Sâliha’ya münhasıra olduğu şer‘an mütekarrir oldukdan sonra mezbûre Fâtıma meclis-i şer‘-i hatîr-i lâzımü’t-tevkīrde müteveffâ-yı mezbûrun muhallefâtına vâzı‘atü’l-yed olan vâlidesi işbu râfi‘atü’l-kitâb Fâtıma bt. Ahmed nâm hâtun mahzarında bi’t-tav‘ ve’r-rızâ ikrâr-ı tâm ve takrîr-i kelâm edip karındaşım müteveffâ-yı mezbûr Cafer’in ism-i mâl ıtlâk olunur muhallefâtından irs-i şer‘î ile bana isâbet eden nısf hisse-i şer‘iyyemi mezbûre Fâtıma’dan da‘vâ ve taleb eylediğimde beynimize muslihûn tavassut edip karındaşım mezbûr Cafer’in cemî‘ muhallefâtından bana isâbet eden nısf hisse-i şer‘iyyem mukābelesinde alâ tarîki’t-tehârüci’ş-şer‘î beni beş bin beş yüz nakid ceyyid ve cedîd râyic fi’l-vakt akçe üzerine ıslâh ettiklerinde ben dahi sulh-ı mezbûru kabûl ve bedel-i sulh olan meblağ-ı mezbûr beş bin beş yüz akçeyi mezbûre Fâtıma yedinden bi’t-tamâm ve’l-kemâl ahz u kabz edip muhallefât-ı mezkûreye müte‘allik cüz’î ve küllî kalîl ü kesîr ve celîl ü yesîr da‘vâ ve talebden mezbûre Fâtıma’nın [38a ] zimmetini ibrâ-i âm ile ibrâ ve iskāt-ı tâm ile iskāt eyledim, ba‘de’l-yevm bi’z-zât benden veyâhud bi’l-vekâle vekîlimden husûs-ı mezbûra müte‘allik da‘vâ ve nizâ‘ sudûr ve zuhûr ederse lede’l-hükkâmi’l-kirâm mesmû‘a ve makbûle olmasın dedikde mukırra-i mezbûre Fâtıma’nın ber vech-i mübeyyen cârî ve sâdır olan ikrâr ve takrîrini el-mukarru lehü’l-mezbûre bi’l-muvâcehe tasdîk ve bi’l-müşâfehe tahkīk edicek mâ hüve’l-vâki‘ bi’t-taleb ketb ü tahrîr olundu. Hurrire fi’l-yevmi’t-tâsi‘ min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-eimme Sefer Efendi b. Veli el-İmâm, Mustafa Bey b. İsmail, Mehmed Halîfe b. Hasan, Hasan b. Ali el-Müezzin, Hüseyin Bey b. Yusuf, Ali Çelebi b. Kasım, Osman b. Derviş, Ali b. İlyas, Baba Süleyman mine’l-huddâm, İbrahim Çelebi mine’l-huddâm ve gayruhüm mine’l-huzzâr