Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 185 Hüküm no: 195 Orijinal metin no: [38a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zal Mahmud Paşa Evkâfı’na ait harap durumdaki iskele, çeşme ve medresenin tamir edildiği ve keşfine dâir Merhûm ve mağfûrun-leh Zal Mahmud Paşa evkāfı’na mütevellî olan fahrü’l-a‘yân İvaz Ağa meclis-i şer‘-i şerîfde takrîr-i kelâm edip bundan akdem vâkıf-ı mûmâ-ileyhin medîne-i Ebâ Eyyûb-i Ensârî -radiye anhu Rabbühü’l-Bârî-’de vâki‘ câmi‘-i şerîfi kurbunda deryâ yalısında vâki‘ iskelesi harâb olup mürûr ve ubûr mümkün olmamağın mâl-ı vakıfdan müceddeden ta‘mîr edip ve yine vâkıf-ı müşârün-ileyhin evkāfından olup medîne-i mezbûrede tarîk-i âm üzerinde vâki‘ çeşmesini mâl-ı mezbûr ile termîm edip ve yine medîne-i mezbûrede câmi‘-i şerîf kurbunda tahtânî medresesinin hucurâtı meremmâta muhtâc olmağın yine mâl-ı mezbûr ile tevliyyetim hasebiyle termîm eyledim idi, savb-ı şer‘den üzerine varılıp harc ve sarf eylediğim meblağın mertebe-i tahammülü tahmîn olunmak matlûbumdur dedikde cânib-i şer‘den mevlânâ el-Hâc Ali Efendi irsâl olunup ol dahi hâssa mi‘mârlarından Üstâd Mustafa b. Abdullah ve zeyl-i kitâbda mastûrü’l-esâmî olup ebniye-i sukūf ahvâline şu‘ûr ve vukūfu olan bî-garaz müslimîn ile evvelâ sâlifü’z-zikr iskele üzerine varıp mesâha eylediklerinde bi-zirâ‘i’l-bennâ tûlen on sekiz ve arzan iki buçuk bi-hesâb-ı şatrancî kırk beş zirâ‘ gemi tahtası döşemenin beher zirâ‘ı altmışar akçeden iki bin yedi yüz akçe ve sekiz aded Bartın direğine beher tânesi yüz yirmişer akçeden dokuz yüz altmış akçe ve sâniyen mârrü’z-zikr çeşme üzerine varıp nazar eylediklerinde çeşmenin târih taşı ile taban demirine maktû‘an bin akçe ve sâlisen medrese-i mezbûreye varıp müşâhede eylediklerinde altı hucurâtın meremmâtına maktû‘an iki bin sekiz yüz yirmi sekiz akçeden cem‘an iskele ve çeşme ve medresenin ta‘mîr ve meremmâtı ancak yedi bin beş yüz yirmi akçe ile mümkün olur noksan ile olmaz deyû mi‘mâr-ı mezkûr haber vermeğin mevlânâ-yı mezbûr mahallinde vâki‘ hâli tahrîr ve ba‘dehû gelip ihbâr ve takrîr eylemeğin işbu hurûf bi’t-taleb ketb olundu. Tahrîren fi’l-yevmi’r-râbi‘ min Cumâdelûlâ li sene erba‘a ve hamsîn ve elf. Şuhûdü’l-hâl: Fahrü’l-eimmeti’l-kirâm el-Hâc Mehmed Efendi b. Bayram el-İmâm bi-câmi‘i’l-mezbûr, es-Seyyid Ahmed Çelebi b. es-Seyyid Mehmed Çelebi eş-Şâmî, Ali Efendi b. Hüseyin el-Müsta‘id, Mehmed Efendi b. Ali el-Müsta‘id, Mehmed Efendi b. Abdülbâkī el-Müsta‘id, Mustafa Efendi b. el-Hâc Mehmed eş-Şâmî, Mustafa Efendi b. Hanîfî el-Müsta‘id, Mehmed b. Ali el-Kayyım bi-câmi‘i’l-mezbûr ve gayruhüm mine’l-hâzırîn