Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 186 Hüküm no: 196 Orijinal metin no: [38a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın vefât eden Hamal Hasan b. Kenan’da muhtelif zahîre bedelinden kalan alacağını yetimlerinin vasîsinden talep ettiği Bakkal tâifesinden olup medîne-i Ebâ Eyyûb-i Ensârî -radiye anhu Rabbühü’l-Bârî-’de Takyecibaşı mahallesinde sâkin işbu bâ‘isü’l-kitâb Mehmed b. Abdullah nâm kimesne yine mahalle-i mezbûrede sâkin iken bundan akdem vefât eden Hamal Hasan b. Kenan’ın li ebeveyn karındaşı olup evlâd-ı sıgārına kıbel-i şer‘den mansûb vasiyy-i şer‘îsi olan Abdi Bey b. Kenan’ı mahfil-i kazâya ihzâr ve mahzarında üzerine takrîr-i da‘vâ ve bast-ı merâm edip müteveffâ-yı mezbûrun hâl-i hayâtında ve kemâl-i akl-ı sıhhatinde iken ve vasfı ve keyli ve vezni ve adedi beynimizde ilm-i şer‘î ile ma‘lûm müşterâ arpa ve pirinç ve sâir me’kûlât bahâsından zimmetinde yedi bin beş yüz kırk beş [akçe] hakkım bâkī kalmış idi el-hâletü hâzihî meblağ-ı mezbûrun vasiyy-i merkūm Abdi’den alıverilmesi matlûbumdur dedikden sonra gıbbe’s-suâl ve akībe’l-inkâr müdde‘î-i mezbûrdan sıdk-ı makālini mübeyyine beyyine taleb olundukda udûl-i müslimîn ve sikāt-ı muvahhidînden Abdurrahman Çelebi b. Habib ve Mehmed Çelebi b. Mahmud nâm kimesneler li ecli’ş-şehâde meclis-i şer‘a hâzırân olup istişhâd olundukda fi’l-hakīka müteveffâ-yı mezbûr Hamal Hasan müşterâ arpa ve pirinç ve sâir beynimizde ilm-i şer‘î ile ma‘lûm zehâir ve me’kûlât bahâsından müdde‘î-i mezbûr Mehmed’in yedi bin beş yüz kırk akçe zimmetimde hakkı vardır deyû bizim huzûrumuzda ikrâr ve i‘tirâf eyledi, bu husûsa şâhidleriz şehâdet dahi ederiz dediklerinde ba‘de ri‘âyeti şerâiti’l-kabûl şehâdetleri hayyiz-i kabûlde vâkı‘a oldukdan sonra müdde‘î-i mezbûr Mehmed meblağ-ı mezbûru müteveffâ-yı mezbûrdan hâl-i hayâtında istîfâ ve âhara havâle-i şer‘iyye ve vücûh-ı şer‘iyyeden bir vechile zimmetini berî etmediğine istihlâf olundukda mezbûr [38b ] Mehmed dahi alâ vefki’l-mes’ûli anh yemîn billâhi’l-aliyyi’l-azîm etmeğin meblağ-ı mezbûrun edâsına vasiyy-i merkūma tenbîh birle mâ hüve’l-vâki‘ bi’t-taleb ketb olundu. Tahrîren fi’l-yevmi’l-âşir min Cumâdelûlâ li sene erba‘a ve hamsîn ve elf. Şuhûdü’l-hâl: Mustafa Dede b. Musa, İbrahim Çelebi b. Ali, Mustafa Çelebi b. Abdullah, Ali Çelebi b. Mehmed, Mustafa Beşe el-Muhtesib, İbrahim Çelebi mine’l-huddâm ve gayruhüm mine’l-huzzâr