Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 187 Hüküm no: 197 Orijinal metin no: [38b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Yorgi’nin otlatmak için Andriye v. İstati’ye verdiği koyunları talep ettiği ve davasını ispat edemediği Çoban tâifesinden Yani v. Yorgi nâm zimmî yine tâife-i mezbûreden işbu râfi‘ü’l-kitâb Andriye v. İstati nâm zimmîyi mahfil-i kazâya ihzâr ve muvâcehesinde üzerine takrîr-i da‘vâ ve bast-ı merâm edip bundan akdem mezbûr Andriye’ye ra‘y etmek için beynimizde vasfı ve levni ilm-i şer‘î ile ma‘lûm yirmi yedi re’s koyun teslîm edip ol dahi vech-i mübeyyen üzre tesellüm etmişdi. Hâlen mesbûkü’z-zikr yirmi yedi re’s koyunu mezbûr zimmî vermede ta‘allül eder suâl olunup alıverilmesi matlûbumdur dedikde gıbbe’s-suâl akībe’l-inkâr müdde‘î-i mezbûr Yani’den da‘vâsına mutâbık beyyine taleb olundukda ityân-ı beyyineden izhâr-ı aczle istihlâf olundukda mezbûr Andriye dahi bi-hasebi’s-suâl yemîn billâhi’llezî enzele’l-İncîle alâ İsâ -aleyhi’s-selâm- etmeğin mûcebiyle mezbûr Yani’yi mu‘ârazadan men‘ birle mâ hüve’l-vâki‘ bi’t-taleb ketb ve imlâ olundu. Tahrîren fi’l-yevmi’s-sâbi‘ min Cumâdelûlâ li sene erba‘a ve hamsîn ve elf. Şuhûdü’l-hâl: Mustafa b. Mehmed min huddâm, Ali b. Mustafa min huddâm, Mustafa b. Veli min huddâm, İbrahim b. Mustafa min huddâm, Hüseyin b. Ali min huddâm, Bayram Sofu mine’l-huddâm, Baba Süleyman b. Turgud, el-Hâc Ahmed Beşe Çukadâr …? ve gayruhüm mine’l-huzzâr