Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 188 Hüküm no: 198 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Abdullah’ın tasarrufundaki tımarını Ömer Çavuş’a iltizâma verdiği iddiasıyla bedelini talep ettiği ve iddiasını ispat edemediği için davadan men edildiği Husûs-ı âti’l-beyânın şer‘ ile görülüp icrâ-yı hak olunması için taraf-ı saltanatdan buyruldu-yı şerîf ve Ebûbekir Çavuş b. Hasan mübâşeretiyle erbâb-ı timardan Ali Bey b. Abdullah meclis-i şer‘-i hatîr-i lâzımü’t-tevkīre merhûm Arslan Paşazâde Arslan Bey tarafından vech-i âtî üzre vekîl olup hasm-ı şer‘î-i câhid mahzarında Mustafa Bey b. Mehmed ve Mehmed Bey b. Mustafa şehâdetleriyle şer‘an vekâleti sâbite olan fahrü’l-akrân el-Hâc Zülfikār Bey b. Mustafa nâm kimesneyi ihzâr ve mahzarında üzerine da‘vâ ve takrîr-i kelâm edip târih-i kitâbdan üç sene mukaddem bin elli bir senesi târihinde vilâyet-i Rumeli’nde Yanya kazâsına tâbi‘ ber vech-i timar mutasarrıf olduğum Maçares nâm karyenin a‘şâr-ı öşriyye ve rüsûm-ı örfiyyesini gāib ani’l-meclis müvekkil-i müşârün-ileyh Arslan Bey huddâmından Ömer Çavuş nâm kimesneye maktû‘an altı bin sekiz yüz akçeye der-uhde ve iltizâm edip merkūm Ömer Çavuş dahi vech-i mübeyyen üzre ta‘ahhüd ve iltizâm eyledikden sonra mezbûr Ömer Çavuş’un zimmetine lâzım gelen meblağ-ı mersûma gāib ani’l-meclis mezbûr Arslan Bey’in kethüdâ[sı] olan Rıdvan Ağa kefîl olup ve mezbûr Rıdvan Ağa’ya dahi müvekkil-i müşârün-ileyh Arslan Bey kefîl olmuşdu el-hâletü hâzihî meblağ-ı mezbûru kefâleti hasebiyle müvekkil-i mûmâ-ileyh Arslan Bey’den da‘vâ ve taleb ederim suâl olunup alıverilmesi matlûbumdur dedikde gıbbe’s-suâl akībe’l-inkâr müdde‘î-i mezbûrdan sıdk-ı makāline mübeyyine beyyine taleb olundukda ityân-ı beyyineden âciz ve kāsır olup istimhâl etmeğin mehil verilip mehil-i mezbûr mürûrundan sonra gelip ityân-ı beyyineden izhâr-ı acz eylemeğin müdde‘î-i mezbûru mu‘ârazadan men‘ birle işbu hurûf ketb olundu. Tahrîren fi’l-yevmi’s-sâbi‘ min Cumâdelûlâ li sene erba‘a ve hamsîn ve elf. Şuhûdü’l-hâl: Mustafa Beşe b. Mehmed, Ali Beşe b. Mustafa, Baba Süleyman b. Turgud, Hüseyin Çelebi b. Ali ve gayruhüm mine’l-huzzâr