Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 250 Hüküm no: 264 Orijinal metin no: [33b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sâliha bt. Abdullah’ın bazı ev eşyalarını, oğulluğu Ramazan’a hibe ettiği Ve kezâlik müvekkilem mezbûrenin oğulluğu bâ‘isü’l-kitâb Ramazan Beşe b. Abdülkerim mahzarında bi’l-vekâle ikrâr ve takrîr-i kelâm edip müvekkilem mezbûre Sâliha eşyâ-i memlûkesinden beynlerinde ma‘lûm bir yemeni yorgan ve bir kırmızı velense ve bir neftî Yanbolu kebesini ve bir beledî yastığını mezbûr Ramazan Beşe’ye hibe ve teslîm ol dahi ittihâb ve tesellüm ettiğinden sonra müvekkilem mezbûre Sâliha bi emrillâhi te‘âlâ dâr-ı fenâdan dâr-ı bekāya intikāl ettiğimde malımdan mezbûr Ramazan Beşe’ye otuz esedî guruş verile deyû vasiyyet edip vasiyyet-i mezbûresini tenfîze zevci hâzır bi’l-meclis mezbûr Mustafa Beşe’yi vasiyy-i muhtâr nasb ve ihtiyâr edip ol dahi kabûl eyledi dedikde mukarrer-i mezbûru ikrâr-ı meşrûhunda mezbûrân Ramazan Beşe ve Mustafa Beşe vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’r-râbi‘ min Cumâdelâhire li sene 1077. Şuhûdü’l-hâl: Es-Sâbikūn.