Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 190 Hüküm no: 200 Orijinal metin no: [39a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Ahmed’in kiraladığı vakıf yoğurtçu dükkânının kirasının emsâlinden yüksek olduğu ve yeniden belirlenmesi talebi üzerine eski kirası üzerinden ödemesine karar verildiği Merhûm ve mağfûrun-leh İbrahim Paşa-yı atîk evkāfı’na hâlen kāimmakām-ı mütevellî olan Fazlullah b. Mustafa meclis-i şer‘-i şerîf-i enver ve mahfil-i dîn-i münîf-i ezherde işbu hâmilü’l-vesîka fahrü’l-emâcid Mehmed Ağa b. Ahmed mahzarında üzerine takrîr-i da‘vâ edip mezbûr Mehmed Ağa bin elli bir Muharremü’l-harâmı’nın onuncu gününde evkāf-ı mezbûreden olup medîne-i Ebâ Eyyûb el-Ensârî -radiye anhu Rabbühü’l-Bârî-’de Câmi‘-i Kebîr sûkunda vâki‘ vâkıf-ı mûmâ-ileyhe intimâ ile tahdîd ve tavsîfden müstağnî bir bâb yoğurtçu dükkânını Perviz nâm müteveffâ mahlûlünden icâre-i mu‘accele ve beher yevm sekiz akçe ücret-i müeccele ile mütevellîsi Halil Bey b. Abdullah’dan istîcâr ve tesellüm eylemeğin zimmetinde sinîn-i mezbûrede ücret-i müecceleden mütekarrir olan dokuz bin altı yüz cedîd akçeyi suâl olunup vakf-ı mezbûr için alıverilmesi matlûbumdur dedikde gıbbe’s-suâl merkūm Mehmed Ağa cevâbında feth-i makāl edip fi’l-vâki‘ dükkân-ı mezbûru târih-i mesfûrdan bir ay mukaddem Perviz mahlûlünden sûk-ı sultânîde beyne’t-tâlibîn müzâyede olundukda elli beş bin akçe hakk-ı karârı ile üzerimde karâr edip ziyâde ile tâlib-i âhar zâhir olmamağın beher şehr elli beşer akçe ücret-i müeccele ile istîcâr ve tesellüm eylediğimden sonra ba‘zı kimesneler muvâza‘a tarîki ile beher yevm sekizer akçe icâre-i müeccele ile kabûl ederiz deyû tâlib olduklarında ben dahi minvâl-i muharrer üzre sekizer akçeye istîcâr eyledim idi, lâkin ücret-i müeccele-i mezbûre ücret-i misliyyesinden zâyide olmağın dükkân-ı mezbûr üç sene mu‘attal olduğundan mâ‘adâ harâba müşrif olmuşdur, mahallinde keşf ve mu‘âyene olunup icâre-i merkūmesi ve ücret-i misliyye-i kadîmesi üzre îcâr olunmak matlûbumdur dedikde savb-ı şer‘den mevlânâ el-Hâc Ali Efendi irsâl olunup ol dahi hâssa mi‘mârlarından Usta Mustafa b. Abdullah ile mahall-i ma‘hûda varıp müşâhede ve mesâha eylediklerinde vakf-ı mezbûrdan olup dükkân-ı merkūma mülâsık olan yoğurtçu dükkânlarının arsası dükkân-ı mütenâzi‘un fîhden tûlen ve arzan ikişer zirâ‘ ziyâde olduğun haber verdikden sonra zeyl-i kitâbda mastûrü’l-esâmî olan müslimîn dahi dükkân-ı mezbûrun ücret-i müeccele-i misliyye-i kadîmesi beher şehr elli beşer akçe olduğunu alâ tarîki’ş-şehâde ihbâr eylediklerinde mevlânâ-yı mezbûr vâki‘ hâli mahallinde tahrîr ba‘dehû gelip meclis-i şer‘de ihbâr ve takrîr eylemeğin icâre-i merkūme fesh olunup elli beş bin akçe icâre-i mu‘accele ve beher şehr elli beşer akçe ücret-i müeccele-i kadîmesi üzre îcâr olunmak vakfa evlâ ve enfa‘ ve ahrâ olmağın merkūm Fazlullah Efendi dahi minvâl-i muharrer üzre dükkân-ı mezbûru merkūm Mehmed Ağa’ya îcâr ol dahi istîcâr ve kabûl eylemeğin işbu hurûf mâ vaka‘a bi’t-taleb ketb ve terkīm olundu. Tahrîren fî gurreti Cumâdelûlâ li sene erba‘a ve hamsîn ve elf. Şuhûdü’l-hâl: Fahrü erbâbü’t-tahrîr Mehmed Çelebi eş-şehîr bi-Arabzâde, Ahmed Bey b. Osman el-Cündî, Ahmed b. Mehmed el-Kâtib, el-Hâc Mahmud b. Mustafa câbi-i vakf-ı mezbûr, Mehmed Beşe b. Bâli, Mehmed b. Abdullah el-Bostânî, Mehmed b. Abdullah Berberî, el-Hâc Ahmed Beşe Çukadâr, Mustafa Beşe el-Muhtesib, Hüseyin Çelebi mine’l-huddâm, Usta Ali b. Mehmed, Hasan b. Abdullah ...? ve gayruhüm