Eyüb Mahkemesi (Havass-ı Refia) 49 Numaralı Sicil (H. 1054 / M. 1644) cilt: 26, sayfa: 191 Hüküm no: 201 Orijinal metin no: [39a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Haydar’ın bahçesini İbrahim Efendi b. el-Hâc Mehmed’e sattığı Medîne-i Ebâ Eyyûb-i Ensârî mahallâtından Kiremitçi Süleyman mahallesinde sâkine Fâtıma Hâtun bt. Haydar taraf[ın]dan vech-i âtî üzre bey‘ ve kabz-ı semeni ikrâra vekîl olup hasm-ı şer‘î-i câhid mahzarında fahrü’l-müderrisîni’l-kirâm Ahmed Efendi b. Cafer ve Mehmed Çelebi b. Mustafa er-Râcil şehâdetleri ile şer‘an vekâleti sâbite olan zahrü’l-eimme Mustafa Efendi b. Ali meclis-i şer‘-i hatîr-i lâzımü’t-tevkīrde işbu kitâb-ı sedâd-intisâbın hâfızı umdetü kuzâti’l-İslâm zübdetü vülâti’l-enâm İbrahim Efendi b. el-Hâc Mehmed muvâcehesinde bi’l-vekâle ikrâr ve takrîr-i kelâm edip mahalle-i mezbûrede vâki‘ bir tarafdan ba‘zan müvekkile-i mezbûre mülküne ve ba‘zan Kenan b. Abdullah mülküne ve bir tarafdan Âişe Hâtun bt. el-merhûm Mehmed Bey mülküne ve bir tarafdan Âlime Hâtun bt. ( ) mülküne ve bir tarafdan Ümmügülsüm bt. ( ) mülküne müntehî olup bi’r-i mâyı ve eşcâr-ı müsmire ve gayr-ı müsmireyi hâvî tûlen ve arzan bi-hesâb-ı şatrancî yüz seksen zirâ‘ arsayı müştemil mülk bahçeyi cümle tevâbi‘ ve levâhıkı ve âmme-i menâfi‘ ve merâfıkı ile müşârün-ileyh İbrahim Efendi’ye altı bin fıddî cedîd ve ceyyid râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile [39b ] bey‘ ve teslîm ve ol dahi vech-i mübeyyen üzre iştirâ ve kabz ve tesellüm eyledikden sonra semeni olan meblağ-ı mârrü’n-na‘t altı bin akçeyi mûmâ-ileyh İbrahim Efendi yedinden bi’t-tamâm ve’l-kemâl ahz u kabz eyledi ba‘de’l-yevm zikr olunan bahçe mûmâ-ileyh İbrahim Efendi’nin mülk-i müşterâ-yı sahîh ve sarîhidir keyfe mâ yeşâ’ ve hasbe mâ yürîd mutasarrıf olsun dedikde vekîl-i mezbûrun minvâl-i muharrer üzre cârî ve sâdır olan ikrâr ve takrîrini mûmâ-ileyh İbrahim Efendi bi’l-muvâcehe tasdîk edicek mâ hüve’l-vâki‘ bi’t-taleb sebt olundu. Hurrire fi’l-yevmi’s-sânî aşer min Cumâdelûlâ li sene erba‘a ve hamsîn ve elf. Şuhûdü’l-hâl: Abdurrahman Efendi b. Abdullah el-Hatîb, muharrirü’l-hurûf Hidâyetullah Efendi el-Kadı, Ali Çelebi b. Halil el-Yesârî, Hasan Çelebi b. Mustafa Efendi, Mustafa Beşe b. Abdullah